28 жилийн өмнө Чилиэс явганаар гарсан Карл Бушби гэртээ хүрэх дөхөж байна

Британийн аялагч Карл Бушби 1998 онд Чилийн Пунта-Аренасаас гарсан явган аяллынхаа төгсгөлд дөхөж, төрсөн Халл хотдоо хүрэх сүүлийн километрүүдээ туулж байна гэж Би Би Си-гийн орос хэлний алба мэдээлжээ.

Тэр үед 29 настай байсан хуучин шүхэрчин цэрэг аялал дуусахаас өмнө Их Британид буцахгүй, ямар ч тээврийн хэрэгсэл хэрэглэхгүй гэсэн хоёр дүрэм өөртөө тогтоожээ.

Одоо 57 настай Бушби Дарьений цоорхойн ширэнгэн ой, Берингийн хоолойн мөсийг даван туулж, хэдэн долоо хоногийн өмнө Ла-Маншийн хоолойг сэлж гаталжээ. Түүний аялал дөрвөн тивийг дамжиж, 42 мянган километр үргэлжилсэн байна.

Барианд түүнийг 36 настай хүү Адам, анх удаа уулзах 12 настай ач охин, аав, ах дүү нар нь хүлээж байгаа бол 28 жилийн өмнө орхисон бага насны гэрт нь ээж нь хүлээж байна.

«Миний бүх мөн чанар, өөрийнхөө тухай мэддэг бүхэн алга болно» гэж Бушби хэлжээ. Тэрбээр амьдралынхаа тал хувийг адал явдал хайгч байсан тул өөрийгөө дахин ойлгох шаардлагатай болно гэжээ.

Бушбигийн хэлснээр, гэрээсээ хол байсан 28 жилийн ердөө 15 орчим жилийг аялалд зарцуулсан бөгөөд үлдсэн хугацаанд виз бүрдүүлж, геополитикийн бэрхшээлийг шийдэж, аяллын үе шатуудын хооронд амьдралын зардал багатай Мексикт амьдарч байжээ. Ковидын цар тахлын үеийн зорчих хязгаарлалт ч аяллыг саатуулсан юм.

Тэрбээр өөрийн дүрмийн улмаас гэр бүлтэйгээ уулзахаар Их Британид буцаж ирж чадаагүй бөгөөд хүү, тусдаа амьдардаг эцэг эхтэйгээ бусад оронд хэд хэдэн удаа уулзсан байна.

«Би хүний хамгийн сайн талыг өөрийн биеэр харсан нь намайг их урамшуулсан» гэж тэрбээр хэлжээ.

Бушби ивээн тэтгэгчид, номын гэрээ гарахаас өмнө амьд үлдэхийн тулд хандив, тэр байтугай замын хажууд хаясан хоолонд ч найдаж байсан мөнгөгүй аялагч байсан юм.