Абу Дабид Орос, Украины энхийн хэлэлцээний шинэ шат эхэлжээ

Орос, Украины төлөөлөгчид Мягмар гарагт Абу Дабид АНУ-ын зуучлалтай энхийн хэлэлцээний шинэ шатыг эхлүүлснийг Москоу Таймс сайт мэдээлжээ.

Лхагва гараг хүртэл үргэлжлэх хэлэлцээнд Цагаан ордны тусгай элч Стив Уиткофф, Жаред Кушнер нар дахин зуучилж байна.

Хоёр талын төлөөлөгчид хамгийн сүүлд 2 дугаар сард Женевт уулзсан ч АНУ, Израиль Ирантай дайтаж эхэлснээр хэлэлцээ зогссон юм. Түүнээс хойш хоёр улс бие биеийнхээ нутаг руу хийх довтолгоогоо эрс нэмэгдүүлжээ.

Оросын төлөөлөгчдийг Кремлийн зөвлөх, соёлын сайд асан Владимир Мединский ахалж, бүрэлдэхүүнд цэрэг, тагнуулын өндөр албан тушаалтнууд багтжээ.

Нээлтийн хуралдааны өмнөхөн Украины төлөөлөгчид Европын болон НАТО-гийн төлөөлөгчидтэй уулзсан тухайгаа Украины ахлах хэлэлцээч Рустем Умеров мэдээлсэн байна.

Умеровын бичсэнээр энэ шатны гол сэдэв нь байлдааны ажиллагааг зогсоох, дайны дараах аюулгүй байдлын баталгаа, Украины эдийн засгийн сэргэлт, хүмүүнлэгийн алхмууд аж.

АНУ-ын албаныхан Украины дайн болон Европын аюулгүй байдлын асуудлыг зэрэг шийдэхийг зорьж, Европ хэлэлцээнд суудалтай байх ёстой гэж үзэж байгаа бол Москва үүнийг одоог хүртэл эсэргүүцсээр байна.