Абу-Дабийн Alpha Dhabi компани дэлхийн хиймэл оюун ухааны салбарт 1 тэрбум доллар хөрөнгө оруулна

Абу-Дабийн хөрөнгийн биржид бүртгэлтэй International Holding Company-ийн охин компани Alpha Dhabi Holding дэлхийн хиймэл оюун ухааны компаниудад 1 тэрбум ам.доллар хөрөнгө оруулах гэрээ байгуулснаа Даваа гарагт мэдэгдсэнийг The National мэдээлэв. Хөрөнгө оруулалтыг өндөр өсөлттэй компаниудыг онилдог Alpha Wave III сангаар дамжуулан хийх бөгөөд сангийн хөрөнгө оруулалтын хөтөлбөрийн дагуу үе шаттайгаар зарцуулна.

Компанийн гүйцэтгэх захирал Хамад Аль Амери энэ хөрөнгө оруулалт багцаа төрөлжүүлэх, урт хугацааны үнэ цэн бүтээх зорилтыг дэмжинэ гэв. Энэ нь компанийн 2022 онд Alpha Wave Ventures II санд оруулсан 2.5 тэрбум ам.долларын хөрөнгө оруулалтын үргэлжлэл бөгөөд тэр сангаар дамжуулан SpaceX, OpenAI, Anthropic зэрэг компаниудад шууд бусаар хөрөнгө оруулжээ.

2013 онд байгуулагдсан Alpha Dhabi 45 оронд 250 гаруй нийтийн болон хувийн хөрөнгө оруулалтын багц удирддаг бөгөөд хиймэл оюун ухаан, технологи, үл хөдлөх хөрөнгө, аж үйлдвэр, эрүүл мэнд, эрчим хүчний салбарт хөрөнгө оруулдаг.

Компани 8-р сард эмиратын төрийн сан Мубадалатай байгуулсан хувийн зээлийн хамтарсан компанид хөрөнгө оруулалтаа 1 тэрбум ам.доллар болгож, хувьцаагаа 20 хувиас 40 хувь болгосон бөгөөд энэ компани 45 компанид 1.7 тэрбум орчим ам.долларын хөрөнгө удирддаг. 5-р сард Абу-Дабийн Ta'ziz компанитай химийн аж үйлдвэрт 10 тэрбум ам.долларын хөрөнгө оруулалт хийх гэрээ байгуулжээ.