“Агентство”: Путин дөрөв дэх ач хүүтэй болсон бололтой

Владимир Путины бага охин Катерина Тихонова Адриан хэмээх хүү төрүүлснийг “Агентство” хэвлэл иргэний бүртгэлийн газрын задарсан бүртгэлийг судлан тогтоолоо.

Тус хэвлэлийн мэдээлснээр, хүүхэд 2025 оны наймдугаар сарын 15-нд Москвад төржээ. Түүний эцэг нь Тихоноватай харилцаатай балетмейстер Игорь Зеленский байж магадгүй гэж тус хэвлэл үзэж байгаа ч хүүг Адриан Игоревич Тихонов гэж эхийнх нь ургийн овгоор бүртгүүлсэн байна.

Хүүхдийн төрсний анхны баримтыг Ерөнхийлөгчийн хэрэг эрхлэх газрын Төв клиникийн эмнэлэг олгосон бол төрсний гэрчилгээг Москвагийн Чертаново дахь иргэний бүртгэлийн хэлтэс бараг жилийн дараа буюу 2026 оны долдугаар сарын 10-нд олгожээ. Ийм саатал гарсан шалтгаан тодорхойгүй.

Гэр бүлийнхэн нь хүүхэд төрснийг нуухыг хүссэн, эсвэл эцэг эх нь өөр өөр ургийн овогтой тул бэрхшээл гарсан нь саатлын шалтгаан байж магадгүй гэж “Агентство” таамаглаж байна.

Тихонова 2013 оноос бизнесмэн Кирилл Шамаловтой гэрлэсэн байсан бөгөөд тэд салсан нь 2018 оны нэгдүгээр сард мэдэгдсэн юм. Тэрбээр тухайн үед Мюнхений Баварийн улсын балетын уран сайхны удирдагч байсан Игорь Зеленскийтэй харилцаатай болжээ. Сэтгүүлчдийн тогтоосноор, тэд 2017 онд төрсөн Эльза хэмээх охинтой.

Путин гэр бүлийнхээ, ялангуяа гимнастикийн тамирчин асан Алина Кабаевагаас төрсөн хөвгүүдийнхээ тухай мэдээллийг нууцалдаг. Түүнээс гадна Путин том охин Мария Воронцовагаас хоёр ач хүүтэй.