АНУ энхийн хэлэлцээг сэргээхийг хичээж буй энэ үед Орос, Украин бие бие рүүгээ довтолжээ

Орос, Украин Пүрэв гарагт (10 дугаар сарын 22) нөгөө талаа олон зуун дрон ашиглан нийслэлийг нь довтолсон хэмээн тус тус буруутгав. Үүнээс нэг өдрийн өмнө Кремль дайныг зогсооход чиглэсэн, АНУ тэргүүтэй гурван талт хэлэлцээг сэргээхийг зарчмын хувьд зөвшөөрч байгаагаа мэдэгдсэн юм.

Украины цэргийнхний мэдээлснээр Москва Украины олон бүс нутаг руу баллистик пуужин харвасан бөгөөд Украины тал Киевийг онилсон Оросын 181 дронг сөнөөжээ.

Украины Ерөнхийлөгч Владимир Зеленский (Volodymyr Zelenskyy) Оросын зарим дрон хамгаалалтыг нэвтэрч, орон сууцны барилга, эрчим хүчний байгууламжийг онсон гэж мэдэгдэв. Орос “манай түншүүдийн агаарын довтолгооноос хамгаалах хэрэгслийн нийлүүлэлт удааширсан боломжийг илт ашиглаж байна” гэж тэрбээр хэлэв.

АНУ-ын Төрийн нарийн бичгийн дарга Марко Рубио (Marco Rubio) Мягмар гарагт сэтгүүлчдэд “Украинд санаатайгаар нийлүүлэхгүй байгаа зүйл гэж байхгүй” гэж хэлэв.

Оросын Батлан хамгаалах яам Пүрэв гарагт мэдэгдэхдээ Киевт пуужин, дроноор өгсөн цохилтын бай нь Украины пуужин, дрон үйлдвэрлэлтэй холбоотой байгууламжууд байсан гэв.

Орос мөн өөрийн цэргүүд 800 гаруй дрон сөнөөсөн бөгөөд ихэнхийг нь Москвагийн бүс нутагт сөнөөсөн гэж мэдэгдэв.

АНУ-ын тусгай элч Стив Уиткофф (Steve Witkoff) энэ долоо хоногт Ослод Зеленскийтэй, Санкт-Петербургт ОХУ-ын Ерөнхийлөгч Владимир Путинтэй (Vladimir Putin) тус тусад нь уулзаж, өөрийнх нь хэлснээр “энхийн хүрээ”-г хэлэлцэв.

“Эдгээр хэлэлцүүлэг бүтээлч болсон бөгөөд цаашид АНУ, Орос, Украины хооронд техникийн түвшний гурван талт хэлэлцээгээр үргэлжилнэ” гэж Уиткофф Лхагва гарагт хэлэв.

АНУ, Орос, Украин гурван улсын хамгийн сүүлийн томоохон хэлэлцээ 1, 2 дугаар сард болсон боловч 2022 оны эхээр Орос Украин руу бүрэн хэмжээний түрэмгийлэл эхлүүлснээр үүссэн мөргөлдөөнийг зогсоох талаар томоохон ахиц гаргаж чадаагүй юм.