АНУ-ын давж заалдах шүүх Калифорнийн саналын хуудасны хэрэгт Трампын засаг захиргааны эсрэг шийдвэр гаргав

Аль-Жазиира телевизийн мэдээлснээр, АНУ-ын 9 дүгээр тойргийн давж заалдах шүүх Даваа гарагт Калифорни мужид энэ сонгуулийн мөчлөгт шуудангаар ирсэн тодорхой саналын хуудсыг тоолоход саад болох Ерөнхийлөгч Дональд Трампын засаг захиргааны хүсэлтийг хангаагүй байна. Шүүх 11 дүгээр сарын 3-ны завсрын сонгуулийн өмнө 20 мянга орчим шуудангийн саналын хуудсыг тусгаарлах засгийн газрын хүсэлтийг хүлээж аваагүй. Засаг захиргаа уг саналын хуудсуудыг иргэн биш байх магадлалтай хүмүүст илгээсэн гэж мэдэгдсэн ч жагсаалтаа хэрхэн гаргасан, жагсаалтад орсон сонгогчдыг иргэншлийн улмаас эрхгүй гэж хэрхэн тогтоосноо олон нийтэд ил болгоогүй байна.

Хоёр саналын эсрэг нэг саналаар гарсан шийдвэрээр давж заалдах шүүх засаг захиргаа доод шатны шүүхэд хэргийг хянах хангалттай хугацаа өгөөгүй гэж үзэж, Калифорнийн саналын хуудас тоолохыг зогсоохоос татгалзав. Шүүхийн олонхи мөн АНУ-ын Үндсэн хуулиар сонгуулийн зохион байгуулалт мужийн хариуцлага гэдгийг онцолжээ. Шүүгч Габриэль Санчес засаг захиргаа мужийн уламжлалт эрх мэдэлд хамаарах асуудлыг холбооны шүүхээр мужийн хууль тогтоох байгууллагад тулгахыг хүсч байгаа бөгөөд хүсэлтийг хангах нь сонгогчид, сонгуулийн албан тушаалтнуудын дунд эмх замбараагүй байдал, төөрөгдөл үүсгэх аюултай гэж бичжээ.

Трампын засаг захиргаа завсрын сонгуулиас гурван долоо хоног хүрэхгүй хугацааны өмнө буюу 10 дугаар сарын 15-нд Калифорнийн эсрэг нэхэмжлэл гаргасан. Ардчилсан намын удирдлагатай Калифорни мужийг Бүгд найрамдах намын удирдагч Трамп сонгуульд хууран мэхэлдэг гэж удаа дараа үндэслэлгүйгээр мэдэгдсээр ирсэн. Хэрэг одоо доод шатны шүүхэд хянагдаж, Мягмар гарагт шүүх хуралдаан хийхээр товлогдсон ч засаг захиргаа сонгууль ойртсоныг дурдаж давж заалдах шүүхээс яаралтай шийдвэр гаргахыг хүссэн юм.

Калифорнийн албан тушаалтнууд иргэн биш байх магадлалтай хүмүүст 20 мянган саналын хуудас илгээсэн гэх засаг захиргааны мэдэгдэлд эргэлзэж, нэхэмжлэлийг санал хураалтад хөндлөнгөөс оролцох оролдлого гэж үзэж байна. “Хамгийн сайндаа энэ нэхэмжлэл бол бодлогогүй улс төрийн жүжиг юм. Хамгийн мууддаа энэ сонгуульд олон мянган калифорничуудыг санал өгөх эрхээс нь хасахаар заналхийлж байна” гэж Калифорнийн Төрийн нарийн бичгийн дарга Ширли Веберийн өмгөөлөгчид 10 дугаар сарын 20-нд шүүхэд гаргасан баримт бичигтээ дурджээ.

Трампын Хууль зүйн яам хувийн эмзэг мэдээлэл агуулсан сонгогчдын жагсаалтад бүрэн нэвтрэхийг шаардан 30 муж болон Вашингтоныг шүүхэд өгсөн бөгөөд одоогоор эдгээр хэргийн 26-д нь ялагдаж, 30 хэргийн аль нэгэнд нь ч ялаагүй байна.

Шинжээчдийн хэлснээр, иргэн бус хүмүүсийн санал өгөх тохиолдол ховор бөгөөд АНУ-ын бүх 50 мужид иргэн бус хүмүүсийг холбооны сонгуульд оролцохыг хориглодог. Өнгөрсөн долоо хоногт засаг захиргаа Калифорнид 28 цагаачийг хууль бусаар санал өгсөн хэргээр яллаж байсан ч Лос Анжелес Таймс сонины мэдээлснээр яллагдсан зарим хүн төөрөлдөж, сонгогчоор хэзээ ч бүртгүүлээгүй гэж мэдэгдсэн байна. Трамп сонгуулийн үйл явцад холбооны нөлөөг нэмэгдүүлэхийг зөвтгөхийн тулд сонгуулийн луйврын тухай худал мэдэгдэл түгээж ирсэн түүхтэй. Тэрбээр 2020 онд Ардчилсан намын Жо Байденд дахин сонгогдох өрсөлдөөнд ялагдсан ч ялагдлаа үгүйсгэж, санал хураалтыг луйвардсан гэж буруутгаж байсан юм.