АНУ-ын Холбооны харилцаа холбооны хороо Ти Пи Линк компанийн зарим чиглүүлэгч цахилгааны хязгаар зөрчсөн гэжээ

АНУ-ын Холбооны харилцаа холбооны хороо Калифорнид төвтэй Ти Пи Линк Системс компанид зарим Вай-Фай чиглүүлэгч нь цахилгааны хязгаарын дүрмийг зөрчсөнийг мэдэгджээ. Энэ тухай Блүүмберг агентлагаас уламжлан Францын Олон улсын радио хятад хэлний хэвлэлдээ мэдээлэв. Энэ алхам тус технологийн компанийн төхөөрөмжүүдэд цаашид хориг тавих үндэс суурь болж мэдэх юм.

Хорооны Инженерчлэл, технологийн газар Ти Пи Линкт илгээсэн хоёр захидалдаа компани дөрвөн загварын чиглүүлэгчийн гэрчилгээ хүсэхдээ худал эсвэл буруу мэдээлэл өгсөн гэж урьдчилан тогтоосон бөгөөд үүнээс гурван загвар туршилтын үеэр цахилгаан хэрэглээний хязгаараас хэтэрсэн гэжээ. 10 дугаар сарын 15-ны өдөртэй захидлуудыг олон нийтэд нийтэлсэн ч өмнө нь мэдээлээгүй байсан бөгөөд газрын лабораторийн хэлтсийн дарга компаниас 10 дугаар сарын 30-ны дотор дэлгэрэнгүй хариу, нотлох баримт ирүүлэхийг шаарджээ.

Захидалд дурдсан загварууд нь 600 орчим ам.доллараар зарагддаг Арчер цуврал тоглоомын чиглүүлэгчээс эхлээд 140 орчим ам.долларын аяллын энгийн чиглүүлэгч хүртэлх бүтээгдэхүүнийг хамарч байна. Компанийн харилцааны асуудал хариуцсан Стив Ковски компани чиглүүлэгчийн мэдээллийг шалгаж, шаардлагатай бол дахин туршиж, асуудал илэрвэл шалтгааныг тогтоож засна гэж мэдэгдэв. Түүний хэлснээр, цахилгааны аливаа зөрчил санамсаргүй тохиолдол бөгөөд захидалд дурдсан дөрвөн бүтээгдэхүүн компанийн энэ оны АНУ дахь борлуулалтын 0.33-аас бага хувийг эзэлдэг.

Хорооны мөрдөн шалгалт Ти Пи Линкт тулгарч буй хууль эрх зүйн саадыг улам нэмэгдүүлж байна. Компанийг АНУ-ын Худалдааны яам, Хууль зүйн яам, Холбооны худалдааны хороо шалгаж байгаа бөгөөд эдгээр шалгалт, нэхэмжлэл нь компани Хятадад үүсгэн байгуулагдаж, тэнд үйл ажиллагаа явуулсаар байгаатай холбоотой үндэсний аюулгүй байдал, монополийн эсрэг, хувийн нууц, хэрэглэгчийн эрхийн асуудлыг хамарч байна.

10 дугаар сарын 6-нд Флорида, Айова, Монтана, Небраска гэсэн дөрвөн муж компанийг хэрэглэгчдийг төөрөгдүүлсэн гэж нэхэмжлэл гаргаснаар компанийг шүүхэд өгсөн мужийн тоо тав болсон бөгөөд Техас 2 дугаар сард нэхэмжлэл гаргасан юм. Ти Пи Линк буруутгалыг үгүйсгэж, шүүх дээр хамгаална гэжээ.

10 дугаар сарын 7-нд 21 мужийн ерөнхий прокурор Холбооны харилцаа холбооны хороонд захидал илгээж, компанийн шинэ загвар чиглүүлэгч худалдах нөхцөлт зөвшөөрлийн хүсэлтэд санаа зовж буйгаа илэрхийлж, компани Хятадын армитай холбоотой хэвээр байгаа тухай асуудлыг шийдвэрлэхийг шаарджээ. Компани 2024 онд бүтцээ өөрчлөхөөс өмнө Хятадын Ти Пи Линк Технолоджиз компанийн харьяанд байсан юм.