АНУ-ын хууль тогтоогч Бээжинг бүх улс төрийн хоригдлоо суллахыг уриалжээ

Редакцийн тайлбар: энэ мэдээг Америкийн дуу хоолойн хятад хэлний нийтлэлээс орчуулав.

АНУ-ын Төлөөлөгчдийн танхимын Хятадын Коммунист намын асуудал хариуцсан тусгай хорооны дарга Жон Муленар Бээжинг Хятад дахь бүх улс төрийн хоригдлыг суллахыг уриалж байна.

Аравдугаар сарын 30 бол Улс төрийн хоригдлын олон улсын өдөр юм. Зөвлөлтийн үеэс эхтэй энэ өдрийг хүний эрхийн бүлгүүдийн дэлхийн эвсэл хоригдлуудтай эв нэгдэлтэй байгаагаа харуулах зорилгоор тэмдэглэдэг.

«Жошуа Вон, Жимми Лай, доктор Юлинь Чэнь, Мин Зин, пастор Гао Чюаньфү, доктор Гүлшан Аббас болон тоо томшгүй бусад хүмүүсийн хэрэг эмгэнэлтэй байна. Эдгээр нь Хятадын Коммунист нам дур мэдэн хорих, буруугаар саатуулах, хамтын шийтгэлийг улс төрийн хөшүүрэг болгож, эрх чөлөөний төлөө тэмцэгчдийн амыг таглахад хэрхэн ашигладгийг харуулж байна» гэж Мичиган мужаас сонгогдсон Бүгд найрамдах намын гишүүн баасан гаригт мэдэгджээ.

Жошуа Вон Хонконгийн ардчиллын алдартай идэвхтэн, Жимми Лай хаагдсан Эппл Дэйли сониныг үүсгэн байгуулагч юм. Хоёулаа Бээжингийн тогтоосон Үндэсний аюулгүй байдлын хуулиар ял эдэлж байна. Лай 20 жилийн ял эдэлж байгаа бол хорлон сүйтгэх хэргээр хоригдож буй Вон гадаад хүчинтэй хуйвалдсан хэргээ хүлээсний дараа нэмэлт ял авах төлөвтэй байна.

Юлинь Чэнь АНУ-ын иргэн, Бостонд амьдардаг газар хөдлөлт судлаач бөгөөд 2024 оны арваннэгдүгээр сард баривчлагдаж, 2025 оны тавдугаар сард тагнуулын хэрэгт буруутгагджээ. Тэрбээр шүүх хурлаа хүлээж байна. Бирмийн гаралтай Америкийн судлаач Мин Зин зургадугаар сард эрдэм шинжилгээний хуралд оролцохоор Хятадад очоод баривчлагджээ. Тэрбээр тагнуулын сэжигээр хоригдож байгаа ч яллагдсан эсэх нь тодорхойгүй байна. АНУ-ын Төрийн департамент хоёулаа буруугаар саатуулагдсан гэж мэдэгджээ.

Пастор Гао Чюаньфү Шиань хотын бүртгэлгүй Сионы гэрэл гэрийн сүмийн хоригдож буй удирдагч юм. Тэрбээр 2025 оны тавдугаар сард эхнэрийн хамт залилангийн хэргээр баривчлагдаж, шүүх хурлаа хүлээж байна. Тэтгэвэрт гарсан уйгур эмч Гүлшан Аббас 2019 онд терроризмтой холбоотой хэргээр оноосон 20 жилийн ял эдэлж байна.

«Энэ бол Хятадын Коммунист намын авторитар засаглалыг эсэргүүцэж, шударга бусаар хоригдож буй бүх тэрс үзэлтний эр зоригийг хүндэтгэх өдөр» гэж Муленар баасан гаригт мэдэгдэлдээ дурджээ.

«Хятад эдгээр хүмүүсийг эрх чөлөө, ардчилалд итгэснийх нь төлөө шоронд хорьсныг дэлхий мартахгүй байх ёстой. Хятадын Коммунист намыг бүх улс төрийн хоригдлоо суллахыг дахин уриалж байна» гэж тэрбээр хэлжээ.

Төлөөлөгчдийн танхимын Хятадын асуудал хариуцсан тусгай хороо 2023 оны нэгдүгээр сард байгуулагдсан юм. Хорооны үүрэг нь АНУ, Хятадын Коммунист намын стратегийн өрсөлдөөнийг судалж, бодлогын зөвлөмж гаргах явдал юм.

Мөн баасан гаригт Хятадын асуудлаарх Конгресс, Гүйцэтгэх засаглалын комисс Хятадын улс төрийн хоригдлын шинэчилсэн мэдээллийн санг Икс сүлжээнд нийтэлжээ.

Энэхүү бие даасан төрийн байгууллагын мэдээлснээр уг сан «бодит хоригдлын зөвхөн багахан хэсгийг» хамарч байгаа бөгөөд баасан гаригийн байдлаар улс төр, шашны хоригдлын 11486 хэрэг, түүний дотор одоо хоригдож буй 2613 хэргийг бүртгэжээ.

«Улс төрийн хоригдлын олон улсын өдөр үнэнийг хэлж, хүний эрхийг хамгаалж, үндсэн эрх чөлөөгөө тайван хэрэгжүүлснийхээ төлөө хоригдож буй бүх хүнийг дурсах ёстой» гэж комисс мэдэгджээ.