АНУ-ын шүүгч Трампын Уолл Стрит Жорнал сонины эсрэг нэхэмжлэлийг хэрэгсэхгүй болгожээ

АНУ-ын холбооны шүүгч Даррин Гейлс Ерөнхийлөгч Дональд Трампын Уолл Стрит Жорнал сонин болон хэвлэлийн эзэн Руперт Мердокийн эсрэг гаргасан арван тэрбум ам.долларын нэхэмжлэлийг хэрэгсэхгүй болгосон гэж Австралийн Эй Би Си телевиз мэдээлжээ.

Шүүгч Ерөнхийлөгч хариуцагчид санаатайгаар гүтгэсэн гэдгийг хуулийн шаардлагын дагуу нотолж чадаагүй гэж дүгнэсэн байна. Хэргийг дахин гаргах боломжгүйгээр хаасан юм.

Нэхэмжлэл 2003 онд Жеффри Эпштейны 50 насны төрсөн өдрөөр бүрдүүлсэн цомогт Трампын нэртэй бэлгийн сэдэвтэй захидал, зураг орсон тухай 2025 оны долоодугаар сарын 17-ны нийтлэлтэй холбоотой байв. Трамп захидлыг бичээгүй гэж үгүйсгэж, нийтлэлийг худал гэж нэрлэсэн байна.

Шүүгч ижил нэхэмжлэлийг энэ оны дөрөвдүгээр сард анх хэрэгсэхгүй болгосон бөгөөд Трамп тэр сард нь дахин гаргасан юм.

Трампын хуульчдын багийн төлөөлөгч Ерөнхийлөгч шийдвэрийг давж заалдана гэж мэдэгдсэн бол Доу Жонс компанийн төлөөлөгч шийдвэрт сэтгэл хангалуун байгааг хэлсэн байна.

Шүүгч шийдвэртээ Дээд шүүхийн 1964 оны «Нью-Йорк Таймс Сулливаны эсрэг» хэргийг иш татжээ. Энэ шийдвэрээр олны танил хүмүүс хэвлэлийг худал мэдээлэл санаатайгаар нийтэлсэн гэдгийг нотлох шаардлагатай болсон юм.