Францын прокурорууд: Буудалга үйлдсэн эр лалын шашинтан, африк гаралтай хүмүүсийг онилсон
Парисын баруун талын хоёр хотод машинаасаа буудсан этгээдийн гэрээс зэвсгийн эд анги, хэт барууны намын наалт олджээ.
Францад хүн амины болон хүн алахыг завдсан хэргээр яллагдагчаар татагдсан эр лалын шашинтан, африк эсвэл хойд африк гаралтай мэт харагдсан хүмүүсийг онилсноо хүлээн зөвшөөрсөн гэж прокурорууд мэдэгджээ. Энэ тухай Аль Жазира мэдээлэв.
Францын терроризмтэй тэмцэх прокурорын газар 39 настай Кевин Т. гэх эрийг «террорист» ажиллагаатай холбоотойгоор албан ёсоор яллагдагчаар татсаныг пүрэв гарагт баталжээ. Прокурор Оливье Кристений хэлснээр Кевин тухайн газрыг «исламистуудын үүр» учраас сонгосноо хүлээн зөвшөөрсөн байна.
Өнгөрсөн баасан гарагт Парисын баруун талын Трапп, Ла Веррьер хотуудаар машинаараа явж байхдаа хүмүүс рүү буудсан халдлагад нэг хүн амь үрэгдэж, долоон хүн шархаджээ. Хохирогчдын дунд хүүхэд байсан бөгөөд ихэнх нь гадаад гаралтай хүмүүс байв.
Халдлагад Конго гаралтай 26 настай Францын иргэн Пенго Боссио Ванги амь үрэгджээ. Прокурорын хэлснээр Кевин «харамсахгүй байгаа» ч «хүүхэд алах» санаагүй байсан гэж мэдүүлсэн байна.
Эрх баригчид Кевиний гэрт нэгжлэг хийхэд зэвсгийн эд анги, сум хийх хайрцаг, хоёр хос төмөр бээлий, ган жад, дуу намсгагч олжээ. Мөн Адольф Гитлерийн «Майн Кампф» ном, Марин Ле Пений хэт барууны Үндэсний эвсэл намыг магтсан наалт олдсон байна.
Прокурорын хэлснээр яллагдагч есдүгээр сард автомат бууны тактикийн үр нөлөөг нэмэгдүүлэх хэд хэдэн эд анги, цагдаагийн бугуйвч, гав олж авсан бөгөөд халдлагад «маш өндөр түвшинд бэлтгэсэн» байжээ.
