Гитлерийн Бүргэдийн үүрт гарсан галын дараа сэжигтнийг баривчлав

BBC-гийн мэдээлж буйгаар, Германы өмнөд хэсэгт орших Бавари мужийн цагдаа Адольф Гитлерийн Альпийн нурууны уулын байр Кельштайнхаус буюу Бүргэдийн үүрт гал гарах үеэр сэжигтнийг саатуулжээ. Сэжигтэн галд холбогдсон эсэхийг тогтоохоор эрүүгийн хэрэг мөрдөн шалгаж байна.

Траунштайн дахь дуудлагын төв Баасан гарагт 21:15 цагт (Гринвичийн цагаар 19:15) барилгаас галын дохио хүлээн авч, гал сөнөөгчид очиход барилга галд автсан байжээ. Цагдаагийн мэдээлснээр, газар нутаг хүрэхэд бэрх байгаа нь гал унтраах ажлыг хүндрүүлж, Бямба гарагийн өглөө ч гал шатсаар байсан бөгөөд онцгой байдлын 200 орчим ажилтан ажилласан. Хүн гэмтсэн тухай мэдээлэл алга.

Берхтесгаден хотын дээр орших энэ байрыг нацист дарангуйлагч засгийн газрынхаа түр суудал болгон ашиглаж, 1941 онд ЗХУ руу довтлохыг төлөвлөхөөр командлагч нартайгаа энд уулздаг байв. Мөн өөрийгөө амьтан, байгальд хайртай хүн мэт харуулсан суртал ухуулгын кинонд энэ орчныг ашигласан.

Нацистууд 1938 онд барьж дуусгасан Бүргэдийн үүр 1945 онд тэднийг ялагдсаны дараа сүйрлээс аврагдаж, түүнээс хойш уулын зоогийн газартай, жуулчдын дунд алдартай газар болжээ. Албан ёсны сайтад нь энэ газрыг “хүнлэг бус нацист дарангуйллын ангалын тухай сэрэмжлүүлэг” гэж тодорхойлжээ. Дэлхийн хоёрдугаар дайны үеэр Гитлер болон түүний дагалдагчид Европын еврейчүүдийг бөөнөөр нь хөнөөсөн зэргээр хэдэн арван сая хүний амь насыг хохироосон.