Йемений хуситууд Саудын Арабын нефтийн дэд бүтэц рүү нисгэгчгүй онгоцоор довтлов

Йемений Ансар Аллах хөдөлгөөн буюу хуситууд Саудын Арабын нефтийн дэд бүтэц рүү нисгэгчгүй онгоцоор цохилт өгсөн гэж хуситуудын төлөөлөгч Яхья Сари мэдэгдсэнийг Ведомости мэдээлэв. Түүний хэлснээр түүхий нефть тээвэрлэлтийг хангадаг шахуургын станцууд бай болсон бөгөөд хөдөлгөөний төлөөлөгчид мөн Йемений Аден, Лахж мужуудад байрлах Арабын эвслийн хүчний цэргийн объектууд руу баллистик пуужин харвасан гэжээ.

Хуситууд 10-р сарын 24-нд Эр-Рияд дахь Хаан Халидын нэрэмжит олон улсын нисэх буудал, Янбу хот дахь Арамко компани руу цохилт өгсөн юм. Тэд мөн Рабиг дахь нефть боловсруулах үйлдвэр, түүхий нефть шахах станц болон Зүүн-Баруун нефтийн хоолой руу довтолсон байна.

Үүнээс гадна Ансар Аллах Даммам дахь Хаан Фахдын нэрэмжит олон улсын нисэх буудал, Наджраны нисэх буудал, Хамис Мушайт дахь агаарын баазад халдсан аж. Хуситууд 10-р сарын 22-нд Эр-Рияд дахь Саудын Арабын Батлан хамгаалах яам руу, 10-р сарын 21-нд Даммамын олон улсын нисэх буудал руу цохилт өгчээ.

Саудын Арабын Иргэний нисэхийн ерөнхий газар 10-р сарын 22-нд халдлагын улмаас хоёр хүн амь үрэгдсэнийг мэдээлсэн бөгөөд мөн өдөр хуситууд Йемений Аден хотын олон улсын нисэх буудал руу цохилт өгсөн байна.