Казахстаны вольфрамын ордыг ашиглагч Америкийн компани нэгдэхээс татгалзаж, биржид гарахаар болов

Казахстаны хоёр том вольфрамын ордыг хөгжүүлж буй АНУ-ын Ков Каз компани Скайлайн Билдерс компанитай нэгдэх төлөвлөгөөгөө цуцалжээ гэж Таймс оф Сентрал Эйша сайт мэдээлэв.

Компани 2027 оны эхний хагаст АНУ-ын биржид хувьцаагаа шууд гаргахаар төлөвлөж байна.

Америкэн Венчерс дөрвөн сая хувьцааг нэг бүрийг 8 ам.доллараар авах амлалт өгсөн нь компанийг 1.97 тэрбум ам.доллараар үнэлж байгаа юм. Хөрөнгө оруулалт хараахан хаагдаагүй аж.

Скайлайн 26 орчим хувийн хувьцаа эзэмшигч хэвээр үлдэнэ. Дональд Трамп Жр, Эрик Трамп нар Скайлайнд шууд бусаар хөрөнгө оруулсан гэх мэдээлэл төсөлд анхаарал татсан ч төслийн шийдвэрт нөлөөлсөн нотолгоог Файнэншл Таймс дурдаагүй юм.

Төсөл Караганда мужийн Хойд Катпар, Дээд Кайракты ордууд дээр төвлөрч байна. Ков Каз лиценз эзэмшигч компанийн 70 хувийг 4 дүгээр сард авсан бөгөөд 30 хувь нь Казахстаны Тау-Кен Самрук компанид үлджээ.

Хоёр ордоос жилд 12 мянган тонн орчим буюу дэлхийн вольфрамын олборлолтын 15 орчим хувьтай тэнцэх бүтээгдэхүүн гарч болзошгүй гэж компани урьдчилсан судалгааг иш татжээ.

АНУ-ын Экспорт-импортын банк 900 сая ам.доллар хүртэл, Олон улсын хөгжлийн санхүүгийн корпораци 700 сая ам.доллар хүртэл санхүүжилт олгох сонирхлоо урьдчилан илэрхийлсэн байна.

Вольфрамыг үйлдвэрийн багаж, сансар, батлан хамгаалахад ашигладаг тул Вашингтон Хятадаас хамаарлаа бууруулахыг зорьж байна. Алматы мужид 2024 оны 11 дүгээр сард Хятадын оролцоотой 300 сая ам.долларын боловсруулах үйлдвэр нээгдсэн юм.