Хий экспортлогч орнуудын форумын Хийн банк салбарын төслүүдийг санхүүжилт, зөвлөгөөгөөр дэмжинэ

Хийн банк салбарын төслүүдийг санхүүжилт, зөвлөгөө, бизнесийн шийдлээр дэмжинэ гэж Оросын Эрчим хүчний сайд Сергей Цивилев сэтгүүлчдэд мэдэгдсэнийг Интерфакс мэдээлэв. Москвад 10-р сарын 26-нд Хий экспортлогч орнуудын форумын сайд нарын уулзалт болсон бөгөөд 10-р сарын 27-нд форумын дээд хэмжээний уулзалт болно. Оролцогчид гишүүн орнуудын хийн төслүүдийг дэмжих банк байгуулах асуудлыг хэлэлцэж байна.

Цивилев Хийн банк байгуулах санаачилгыг урагшлуулж байгаа бөгөөд ийм байгууллага байгуулснаар Африк болон бусад тивд хийн дэд бүтцийг хөгжүүлэх урт хугацааны санхүүжилтийн хэрэгсэлтэй болно гэж хэлэв.

Тэрбээр Хийн банк орнуудад зөвхөн санхүүгийн бүтээгдэхүүн бус зөвлөх дэмжлэг, зах зээлийн томоохон тоглогчдын бизнесийн шийдлийг санал болгосноор дэлхийн эрчим хүчний зах зээлийн хөгжлийн хөдөлгөгч хүч болж чадна гэж онцолжээ.

Хий экспортлогч орнуудын форум нь олон улсын засгийн газар хоорондын байгууллага бөгөөд үйл ажиллагааны тухай хэлэлцээр нь 2009 оны 9-р сарын 30-нд хүчин төгөлдөр болсон. Алжир, Боливи, Египет, Экваторын Гвиней, Иран, Ливи, Нигери, Катар, Орос, Тринидад ба Тобаго, Арабын Нэгдсэн Эмират, Венесуэл бүрэн эрхт гишүүн бөгөөд Орос 2009 оноос хойш бүрэн эрхт гишүүн юм. 2011 оноос хойш гишүүн орнуудын төрийн болон засгийн газрын тэргүүн нарын дээд хэмжээний уулзалт хоёр жил тутам хуралддаг.