Хятад Оросоос 176 сая долларын гахайн мах, дайвар бүтээгдэхүүн импортлов

Хятад 1-9-р сард Оросоос бараг 79 000 тонн гахайн мах, хүнсний дайвар бүтээгдэхүүнийг 176 сая ам.доллараар импортолсныг Агроэкспорт холбооны төв Хятадын Гаалийн ерөнхий газрын мэдээлэлд тулгуурлан мэдээлснийг Ведомости сонин бичив. Худалдан авалт өмнөх оны мөн үеэс биет хэмжээгээр 64 хувиар, үнийн дүнгээр 36 хувиар өсчээ.

Нийлүүлэлтийн дийлэнхийг хөлдөөсөн гахайн дайвар бүтээгдэхүүн буюу 94 сая ам.доллар эзэлж, бусад хөлдөөсөн гахайн мах 77 сая, далны мах, гуя 4 сая ам.долларт хүрчээ.

Орос Хятад руу гахайн мах экспортлогч орнуудын тавдугаарт явж байна. Хятад Испаниас 670 сая, АНУ-аас 448 сая, Бразилаас 231 сая, Даниас 225 сая ам.долларын мах худалдаж авсан байна.

Агроэкспорт 10-р сарын 23-нд мэдээлснээр Орос 2026 оны эхнээс 10-р сарын дунд хүртэл Хятад руу 9 сая орчим тонн хөдөө аж ахуйн бүтээгдэхүүнийг 7.8 тэрбум орчим ам.доллараар экспортолжээ. Энэ нь 2025 оны бүтэн жилийн 7.7 тэрбум ам.долларын өмнөх дээд амжилтыг 100 сая орчим ам.доллараар давсан түүхэн дээд үзүүлэлт юм.