Нетаньяху араб цөөнхийн эсрэг арьс өнгөөр ялгаварласан кампанит ажил өдөөж байна хэмээн Эйзенкот буруутгав

Түр Ерөнхий сайд Биньямин Нетаньяху араб цөөнхийн хууль тогтоогчдыг Хамастай холбож нэр хүндийг нь гутаахыг оролдсон байна. Үүний дараа Израилийн Ерөнхий сайдад нэр дэвшигч Гади Эйзенкот Баасан гарагт Нетаньяхуг араб цөөнхийн эсрэг арьс өнгөөр ялгаварласан кампанит ажил өдөөж байна гэж буруутгажээ.

Нэр хүндтэй еврей улс төрч араб гаралтай израильчуудыг ингэж тууштай өмгөөлсөн нь ховор тохиолдол юм. Тэд хүн амын 20 гаруй хувийг эзэлдэг.

Араб иргэд голлосон Раам, Хамтарсан жагсаалт гэсэн хоёр нам өнгөрсөн сарын сонгуулиар нийт 19 суудал авч, 120 суудалтай парламентын бараг зургааны нэгийг эзэлжээ. Эдгээр нам Эйзенкот засгийн газар бүрдүүлэхэд шийдвэрлэх үүрэг гүйцэтгэж магадгүй.

“Израилийн араб иргэд бол Израилийн түүхийн салшгүй хэсэг” гэж Эйзенкот Баасан гарагт X сүлжээнд бичжээ.

“Бүрэн эрх нь дуусаж буй Ерөнхий сайд болон түүний хүрээнийхэн улс төрийн зорилгоор өдөөсөн арьс өнгөөр ялгаварласан, түрэмгий гутаах кампанит ажилд тэд өртсөн” гэж тэрбээр нэмж бичсэн байна.

“Тэднийг нийтээр нь гадуурхаж, гутаах оролдлого бол иргэний хариуцлагын зарчмыг ноцтой зөрчиж байгаа хэрэг” гэжээ.

2023 оны аравдугаар сарын 7-нд Израилийн эсрэг үйлдсэн урьд өмнө байгаагүй халдлагаас хойш Хамасыг “террорист бүлэглэл” гэж нэрлэхээс татгалзсан араб намуудын удирдагчдыг Нетаньяху болон түүний холбоотнууд удаа дараа шүүмжилсээр ирсэн юм.

Араб намуудын бүх удирдагч уг халдлагыг буруушаажээ. Амь үрэгдэгсдийн дунд араб гаралтай израильчууд ч байсан. Тэд 1948 онд Израиль болсон нутагт үлдсэн палестинчуудын үр удам юм.

Нетаньяху мөн араб иргэд голлосон намуудыг сонгуулийн луйвар хийсэн гэж удаа дараа буруутгасан ч сонгуулийн байгууллага эдгээр буруутгалыг няцаасан байна.

Нетаньяху үг хэлэхдээ хоёр араб жагсаалт Израилийг еврей улс гэж хүлээн зөвшөөрөхөөс татгалздагт харамсаж байгаагаа илэрхийлжээ. Гэвч Раам намын удирдагч Мансур Аббас өмнө нь хүлээн зөвшөөрч байсан юм.

Тэрбээр мөн эдгээр нам “Исламын улс” эсвэл “үндсэрхэг Палестин улс” байгуулахыг зорьж байна гэж мэдэгджээ.

Мөн тэр ёслолын үеэр Хамтарсан жагсаалтын удирдагч Юсеф Жабарин тангараг өргөж байхад Үндэсний аюулгүй байдлын сайд Итамар Бен-Гвир түүнийг “Хамаст үнэнч байхаа тангарагласан” гэж буруутган хашгирчээ.

“Араб намуудын төлөөлөгчидтэй санал зөрөх, бүр заримыг нь эрс эсэргүүцэх нь бүрэн хууль ёсны зүйл. Гэхдээ бүхэл бүтэн нийгэмлэгийг гүтгэх нь хууль ёсны ч биш, хүлээн зөвшөөрөхүйц ч биш. Би үүнийг зөвшөөрөхгүй” гэж Эйзенкот хэлжээ.

Хоёр араб жагсаалт зэрэг улс төрийн намуудын олонх Эйзенкотыг санал болгосны дараа Ерөнхийлөгч Ицхак Херцог Ням гарагт түүнд шинэ засгийн газар бүрдүүлэхийг даалгасан юм.

Гэвч араб гаралтай израильчууд эвсэлд орвол эвслээс гарна гэж Эйзенкотын баруун жигүүрийн холбоотнуудын нэг Авигдор Либерман мэдэгджээ.

Эйзенкот 28 хоногийн дотор засгийн газар бүрдүүлж чадахгүй бол 14 хоногоор сунгах хүсэлт гаргаж болно. Тэр хугацаанд ч бүрдүүлж чадахгүй бол бүрэн эрх өөр хууль тогтоогчид, хамгийн магадлалтай нь Нетаньяхуд шилжинэ.