Нидерланд, Азербайжан хамтын ажиллагааны замын зураглалыг тохиролцов

Нидерланд, Азербайжан хоёр талын хамтын ажиллагааг өргөжүүлэх зорилготой 2026 оноос 2028 он хүртэлх хугацааны замын зураглалыг тохиролцсон гэж Нидерландын Гадаад хэргийн сайд Том Берендсен мэдэгдсэнийг Интерфакс мэдээлэв. Берендсен Бакуд Азербайжаны Гадаад хэргийн сайд Жейхун Байрамовтой хамт хийсэн хэвлэлийн бага хурал дээр Азербайжан бол Өмнөд Кавказ дахь Нидерландын чухал түнш гэж хэлжээ.

Түүний хэлснээр замын зураглал улс төр, эдийн засаг, боловсрол, соёлын хамтын ажиллагааг гүнзгийрүүлж, өргөжүүлэх хүсэл эрмэлзлийг баталгаажуулсан бөгөөд Өмнөд Кавказын энх тайван, тогтвортой байдал, хөгжил цэцэглэлтэд хувь нэмэр оруулна.

Байрамов хоёр улс хамтын ажиллагааг шинэ чиглэлээр өргөжүүлэх, ногоон эрчим хүч, Европын зах зээл дэх Азербайжаны үүрэг, Дундад коридорын хүрээнд хамтран ажиллах боломжийн талаар ярилцсан гэж тэмдэглэв.

Тэрбээр Алятын чөлөөт эдийн засгийн бүс, Бакугийн олон улсын худалдааны боомт ч гол сэдвүүдийн тоонд багтсан бөгөөд сайд нар Азербайжан, ЕХ-ны харилцааг хөгжүүлэх хэтийн төлөвийг ч хэлэлцсэн гэж нэмж хэлэв.