Нью-Йорк Төв цэцэрлэгт хүрээлэнгийн морин тэргийг хориглохоор шийдлээ

BBC-гийн орос албаны мэдээлснээр, Нью-Йорк хотын зөвлөл хотын бэлгэдэл, жуулчдын татах газруудын нэг болох Төв цэцэрлэгт хүрээлэн болон түүний эргэн тойронд зорчигч тээвэрлэдэг морин тэргийг хориглохоор шийдвэрлэв. Хориг 2028 оны 6 дугаар сарын 1-нээс хүчин төгөлдөр болох бөгөөд Пүрэв гарагт хотын зөвлөлийн гишүүд 40-өөс 7-ийн харьцаатай санал өгчээ. Хуулийг хотын дарга Зохран Мамдани гарын үсэг зурж батлах ёстой.

Морины сайн сайхныг харгалзан хуулийн зохиогчид морьдыг Нью-Йоркийн гудамжинд ажилласны дараа нядалгаанд өгөх, бусад хотын ийм тэргэнцэрийн компанид худалдахыг хориглосон заалт оруулжээ. Одоо Төв цэцэрлэгт хүрээлэнд 68 морин тэрэг ажиллах зөвшөөрөлтэй бөгөөд тэдний тоог Дэлхийн хоёрдугаар дайны үеэс хязгаарласаар ирсэн. Рейтер агентлагийн Төв цэцэрлэгт хүрээлэнгийн тэргэнцэрчдийн үйлдвэрчний эвлэлийн дарга Кристина Хансенаас иш татан мэдээлснээр, 180 гаруй морь, 150 орчим тэргэнцэрч жуулчдад үйлчилдэг.

Хуульд ажлаа алдах хүмүүст туслах төлөвлөгөөг ирэх дөрөвдүгээр сар гэхэд боловсруулах амлалт багтсан ч тэргэнцэрчид, морь, жүчээний эзэд хууль ирээдүйг нь хангалттай баталгаажуулахгүй гэж үзэж байна. Рейтерийн иш татсанаар, тээврийн ажилчдын үйлдвэрчний эвлэлийн дарга Жон Самуэлсон хууль санхүүгийн хувьд сүйрэх, ажил, зөвшөөрөл, бизнесээ алдах тэргэнцэрчид, эздэд юу ч санал болгохгүй байна гэв. Үйлдвэрчний эвлэлийн Нью-Йоркийн салбарын дэд ерөнхийлөгч Александер Кемп “Шүүх дээр уулзъя. Энэ тэмцэл хараахан дуусаагүй” гэж нэмж хэлжээ.

Морин тэргийн хувь заяаны талаарх маргаан олон жил үргэлжилж байна. Хадгалахыг дэмжигчид энэ бол олон кинонд гардаг Нью-Йоркийн романтик бэлгэдлийн нэг гэж ярьдаг. Санал хураалтын өмнө Нью-Йоркт төрсөн АНУ-ын Ерөнхийлөгч Дональд Трамп ч морин тэргийг өмгөөлж, олон нийтийн сүлжээндээ тэд улс төрийн шалтгаанаар алга болох нь маш харамсалтай гэж бичжээ.

Хоригийг дэмжигч амьтны эрхийг хамгаалагчид энэ бол хоцрогдсон зүйл бөгөөд морьдыг хөдөлгөөн ихтэй гудамж, бохирдсон хотын агаарт хүнд ажил хийлгэх нь хүнлэг бус, эрүүл мэндэд нь аюултай гэж үздэг. Амьтадтай ёс зүйтэй харьцах төлөө ард түмэн (PETA) байгууллагын тэргүүн Эшли Бёрн санал хураалт нь морьдыг тээврийн хөдөлгөөн ихтэй гудамжаар хүнд тэрэг чирүүлж, ширүүн цаг агаарт үхтэл нь ажиллуулдаг “жигшүүрт бизнес”-ийн төгсгөл боллоо гэжээ.

2013 онд Билл де Блазио хотын даргаар сонгогдохоосоо өмнө морин тэргийг албан тушаалдаа орсон эхний өдрөө хориглоно гэж амласан бөгөөд хэд хэдэн удаа оролдсон ч бүтэлгүйтсэн. Сүүлийн жилд морин тэрэгтэй холбоотой хэд хэдэн ослын улмаас маргаан дахин сэдэрсэн: 2025 оны тавдугаар сараас хойш дор хаяж долоон жуулчин, тэргэнцэрч гэмтэж, зургадугаар сард айсан морь тэргийг хөмрүүлж, 18 настай энэтхэг жуулчин амь үрэгджээ.