ОХУ-ын ГХЯ АНУ Рауль Кастрог баривчлах тушаал гаргах шалтгаан болсон хэргийг 1996 онд шийдэгдсэн гэж үзэв

АНУ Рауль Кастрог баривчлах тушаал гаргах шалтгаан болсон Америкийн хувийн онгоцуудтай холбоотой хэрэг явдал 1996 онд Москва, Вашингтоны НҮБ-ын Аюулгүйн зөвлөл дэх идэвхтэй хамтын ажиллагаагаар аль хэдийн шийдэгдсэн гэж ОХУ-ын Гадаад хэргийн яамны албан ёсны төлөөлөгч Мария Захарова Даваа гарагт мэдэгдсэнийг Интерфакс мэдээлэв.

Захаровагийн хэлснээр 1996 оны 2-р сарын 24-нд Аюулгүйн зөвлөлийн гишүүдийн хооронд эрчимтэй зөвлөлдөөн болж, Орос, АНУ-ын НҮБ дахь байнгын төлөөлөгч Сергей Лавров, Мадлен Олбрайт нар хамгийн идэвхтэй үүрэг гүйцэтгэжээ. Тэдний хүчин чармайлтаар бүх талыг хангасан мэдэгдлийг тохиролцож, 1996 оны 2-р сарын 27-нд Аюулгүйн зөвлөлийн даргын нэрийн өмнөөс гаргасан бөгөөд үүнд хувь хүнийг буруутгасан, хэн нэгэнд хариуцлага хүлээлгэхийг уриалсан зүйл байгаагүй гэж тэрбээр онцлов.

Захарова мэдэгдэлд санал болгосон хандлагыг дараа нь 1996 оны 7-р сарын 26-ны Аюулгүйн зөвлөлийн 1067 дугаар тогтоолын үндэс болгосон нь зөвлөлийн бүх гишүүн хэрэг явдлыг шийдэгдсэн гэж үзэж байгааг бодитоор илэрхийлсэн гэжээ. Тэрбээр Орос, АНУ-ын хамтын ажиллагааны энэ үеийг өнөөдөр гаргаж буй буруутгалын хууль зүйн үндэслэлгүйг онцлохын тулд 10-р сарын 20-ны ГХЯ-ны мэдэгдэлд дурдсан гэж нэмж хэлэв.

Энэ сарын эхээр Флорида мужийн 11 дүгээр тойргийн шүүгч Ариана Фахардо Оршан Рауль Кастрог нэгдүгээр зэргийн хүн амины хэрэг үйлдэхээр хуйвалдсан гэх хэргээр баривчлах тушаалд гарын үсэг зурсан юм. 1996 оны 2-р сарын 24-нд Кубын МиГ-29 онгоц Кубын засгийн газрыг эсэргүүцдэг Америкийн хүмүүнлэгийн байгууллагын хоёр Сессна онгоцыг сөнөөж, дөрвөн хүн амь үрэгдсэн. 94 настай Рауль Кастро бол Кубын удирдагч асан Фидель Кастрогийн дүү бөгөөд 2008 оноос 2018 он хүртэл Кубын Ерөнхийлөгч байсан юм.