Өмнөд Африкт зөвшөөрөлгүй экспортлох гэж байсан таван аварга баобаб модыг 900 км зайтай дархан газарт зөөж эхэлжээ

Ухаж гаргаснаас хойш гурван сар болсон таван аварга баобаб модыг Мпумаланга, Лимпопо мужийн зааг дахь Тимбавати хувийн байгалийн нөөц газарт шилжүүлэхээр Дурбан боомтоос тээвэрлэж эхэлжээ гэж Дэйли Маверик сайт мэдээлжээ. Модод усгүйдэж хорчийсон ч амьд байна.

Аврах ажиллагаа 11 дүгээр сарын 11-ний орой эхэлж, эхний модыг 900 гаруй км зам туулах тусгай том оврын ачааны машинд ачжээ. Энэ аврах төлөвлөгөөг Баобаб сангийн үүсгэн байгуулагч, эколог Сара Вентер санаачилсан юм.

Ойн аж ахуй, загас агнуур, байгаль орчны яам модыг Хар тэнгисийн эргийн Гүрж улс руу экспортлох гэж байхад нь 7 дугаар сарын сүүлээр саатуулжээ. Модыг Гүржийн Ерөнхий сайд асан, тэрбумтан Бидзина Иванишвилийн эзэмшлийн газрыг чимэглэхэд зориулж байсан бололтой.

Яамны мэдээлснээр, экспортлогч модыг авах, тээвэрлэх, экспортлох хүчинтэй зөвшөөрлөө гаргаж үзүүлж чадаагүй байна. Үүний улмаас мод Дурбан дахь тээврийн агуулахын задгай зогсоолд гурван сар гаруй хэвтээ байрлалтай хэвтжээ.

“Хэрэв тэд Дурбанд үхсэн эсвэл Гүрж рүү экспортлогдсон бол Өмнөд Африкийн байгаль хамгааллын талаар дэлхийд буруу мессеж өгөх байсан” гэж Вентер хэлэв. Кенийн эргээс ухаж авсан найман баобаб мод ижил төстэй маргааны улмаас удаан саатсаны дараа Гүржид очоод удалгүй үхэж байжээ. Ийм явдал давтагдахыг тэд хүсээгүй гэж Вентер нэмж хэлжээ.

Ачих, тээвэрлэх, дахин суулгах зардлыг Тимбавати нөөц газар хариуцахаар болжээ. Вентерийн хэлснээр, модод эрүүл харагдаж байгаа ч их биендээ хадгалсан усаа зарцуулж амьд үлдэж буй тул аль болох хурдан хөрсөнд суулгах шаардлагатай байна. Эрүүл баобабын жингийн 75 хувь хүртэл нь ус байдаг аж.

Модод энэ долоо хоногийн сүүлээр эсвэл ирэх долоо хоногийн эхээр хүрч очих төлөвтэй гэж Тимбавати нөөц газрын эколог Алмеро Бош мэдэгджээ. Модыг суулгах талбайг өлссөн заанаас хамгаалж хашаажээ. Модыг унахаас сэргийлж тросоор бэхэлнэ.

Модыг Гүрж рүү экспортлохыг оролдсон Претория дахь Дивайн Ландскейпс компани өмгөөлөгчөөрөө дамжуулан мэдэгдэхдээ, модыг зэрлэг байгалиас биш, хувийн цэцэрлэгээс эзнийх нь бүрэн зөвшөөрөлтэйгөөр авсан гэжээ. Гэвч яам компанид зөвшөөрлийг нөхөж олгохоос татгалзжээ. Компанийг Үндэсний ойн тухай хуулийн дагуу эрүүгийн хэргээр 1 дүгээр сард Дурбаны шүүхэд очихоор дуудаад байна.