Өмнөд Солонгос, АНУ хоёр долоо хоногийн хамтарсан агаарын сургуулилт эхлүүлэв

Өмнөд Солонгос, АНУ хоёр энэ долоо хоногт агаараас хамгаалах болон агаарын хоригийн ажиллагаанд төвлөрсөн хамтарсан агаарын сургуулилт эхлүүлснийг тус улсын Агаарын цэргийн хүчин Даваа гарагт мэдэгдсэн гэж The Korea Times мэдээлэв. Freedom Flag сургуулилт Даваа гарагт Сөүлээс баруун урагш 180 орчим километрт орших Гунсан хотын Кунсан агаарын баазад эхэлсэн бөгөөд хоёр долоо хоног үргэлжилнэ.

Сургуулилтад Өмнөд Солонгосын Агаарын цэргийн хүчний F-15K, KF-16, F-35A сөнөөгч онгоц, KC-330 тээврийн онгоц, E-737 Peace Eye эрт сэрэмжлүүлэх, удирдлагын онгоц оролцоно. Америкийн талаас Агаарын цэргийн хүчний F-16 Fighting Falcon сөнөөгч, RC-135 тагнуулын онгоц, Тэнгисийн цэргийн хүчний MH-60S Seahawk нисдэг тэрэг, мөн Тэнгисийн явган цэргийн F-35B үл үзэгдэх сөнөөгч, MQ-9 Reaper нисгэгчгүй тагнуулын онгоц оролцох юм.

Хоёр орны агаарын хүчин өдөр, шөнийн цагаар ажиллах ажиллагаа төлөвлөлтийн бүлгүүд байгуулж, тактик, туршлагаа солилцохын зэрэгцээ дайны үеийн ажиллагаа, даалгавар гүйцэтгэх журмаа боловсронгуй болгоно. Сургуулилт нь харилцан уялдаатай ажиллах чадварыг дээшлүүлж, агаараас хамгаалах, агаарын хориг тогтоох зэрэг хамтарсан байлдааны чадварыг бэхжүүлэх зорилготой гэж Агаарын цэргийн хүчин мэдэгдэв.

Орчин үеийн дайны нөхцөл өөрчлөгдөж буйг харгалзан энэ удаагийн сургуулилтаар Өмнөд Солонгос тэргүүлсэн хамтарсан сургуулилтын төлөвлөлт, гүйцэтгэлийг ч үнэлнэ. Энэ нь Сөүл дайны үеийн ажиллагааны удирдлагын эрхээ Вашингтоноос эргүүлэн авах хүчин чармайлтын нэг хэсэг юм.

Өмнөд Солонгос хамтарсан хүчнийг удирдах чадвараа баталгаажуулснаар дайны үеийн удирдлагын эрхийг 2030 он гэхэд, эсвэл түүнээс өмнө АНУ-аас эргүүлэн авахыг зорьж байна. Жилд хоёр удаа болдог Freedom Flag сургуулилтыг 2024 онд эхлүүлсэн бөгөөд энэ нь хоёр холбоотны жилийн эхний хагаст хийдэг Korea Flying Training, хоёрдугаар хагаст хийдэг Vigilant Defense хэмээх томоохон агаарын сургуулилтыг орлосон юм.