Өмнөд Солонгос ирэх тавдугаар сараас кредит картын оноог орон нутгийн мөнгө болгохыг зөвшөөрнө

Кредит картын хэрэглэгчид ашиглалгүй хуримтлагдсан урамшууллын оноогоо ирэх оны тавдугаар сараас орон нутгийн мөнгөн эрхийн бичиг болгон хөрвүүлэх боломжтой болно гэж албаныхан Баасан гарагт мэдэгджээ.

Энэ нь хэрэглээг дэмжиж, орон нутгийн эдийн засагт эрч хүч оруулах зорилгоор авч буй арга хэмжээний нэг юм.

Хэрэглээг идэвхжүүлж, уламжлалт зах, хорооллын дэлгүүрүүдийг сэргээхийн тулд янз бүрийн далд, идэвхгүй оноог орон нутгийн мөнгө болгох боломж олгохыг Ерөнхийлөгч Ли Жэ Мён зургадугаар сарын сүүлээр албаныханд үүрэг болгосон байна.

Үүний дараа Ерөнхий сайдын тамгын газрын харьяа Засгийн газрын бодлого зохицуулах алба нь Дотоод хэргийн яам, Санхүүгийн зохицуулах хороо, Солонгосын санхүүгийн харилцаа холбоо ба тооцооны институттэй хамтран нарийвчилсан журмыг боловсруулжээ.

Эхний ээлжинд кредит картын оноог хөрвүүлэхийг зөвшөөрнө.

Хуримтлагдсан картын оноо 2.1 их наяд вон буюу 1.57 тэрбум ам.доллартай тэнцэж байгаа бөгөөд ийм оноог бэлэн мөнгө болгох тогтолцоо аль хэдийн бий гэж албаныхан тайлбарлав.

Тавдугаар сараас үйлчилгээ эхэлмэгц хэрэглэгчид “дансны мэдээлэл” эсвэл “орон нутгийн мөнгө” аппликейшнээр оноогоо шалгаж, хүссэн хэмжээгээрээ хөрвүүлэх боломжтой. Хөрвүүлсэн мөнгөө дараагийн өдрөөс нь зарцуулж болно.

Цаашид KTX галт тэрэгний урамшууллын миль болон бусад оноог ч хамруулахаар холбогдох байгууллагуудтай хамтран ажиллах төлөвлөгөөтэй байгаагаа албаныхан хэлсэн байна.

“Өрхийн санхүүгийн дарамтыг хөнгөлж, мөнгийг уламжлалт зах, орон нутгийн худалдааны бүсийн жижиг бизнес эрхлэгчид рүү чиглүүлэн, эцэстээ бүс нутгийн эдийн засагт шинэ эрч хүч оруулахын тулд янз бүрийн идэвхгүй оноог илүү ашиглуулах талаар хэлэлцүүлгээ үргэлжлүүлнэ” гэж Засгийн газрын бодлого зохицуулах сайд Лим Ги Гын хэлжээ.