Өмнөд Солонгос, НҮБ Хойд Солонгосын цөмийн асуудал, цэргийн хиймэл оюун ухааны талаар ярилцлаа

Өмнөд Солонгос болон НҮБ-ын Зэвсэг хураах асуудал эрхэлсэн газрын (UNODA) өндөр албан тушаалтнууд Баасан гарагт уулзаж, Хойд Солонгосын цөмийн хөтөлбөр, цэргийн салбарт хиймэл оюун ухааныг хариуцлагатай ашиглах асуудлыг хэлэлцснийг Өмнөд Солонгосын Гадаад хэргийн яам мэдэгдлээ.

Стратеги, тагнуулын асуудал хариуцсан Гадаад хэргийн дэд сайд Жон Ён Ду, НҮБ-ын Зэвсэг хураах асуудал эрхэлсэн дээд төлөөлөгч Изүми Накамицү нар Сөүлд Пүрэв гарагаас эхэлсэн хоёр өдрийн бага хурлын үеэр уулзжээ. Уг бага хурал зэвсэг хураах, цөмийн зэвсэг дэлгэрүүлэхгүй байх асуудалд зориулагдсан.

Хоёр тал Солонгосын хойгийн нөхцөл байдал, Хойд Солонгосын цөмийн асуудал, НҮБ-ын Ерөнхий Ассамблейн Нэгдүгээр хорооны үр дүн болон Өмнөд Солонгос, UNODA-ийн хамтын ажиллагааг гүнзгийрүүлэх арга замын талаар санал солилцсон байна.

Бага хурлын үеэр Жон Ён Ду цэргийн салбарт хиймэл оюун ухааныг хариуцлагатай ашиглахыг дэмжиж, холбогдох сорилтыг шийдвэрлэхэд олон улсын хамтын ажиллагаа хэрэгтэй байгааг онцолжээ.

Өмнөд Солонгос цэргийн хиймэл оюун ухааны тухай НҮБ-ын Ерөнхий Ассамблейн тогтоолыг санаачилж, Нидерландтай хамтран холбогдох дээд хэмжээний уулзалт зохион байгуулж байсныг тэрбээр дурдаад, тус улс энэ салбарт идэвхтэй үүрэг гүйцэтгэсээр байх болно гэжээ.

Хиймэл оюун ухаан болон бусад технологи хурдацтай хөгжиж байгаа нь шинэ эмзэг байдал үүсгэж, буруу тооцоолол, санамсаргүй хурцадлын эрсдэлийг нэмэгдүүлж болзошгүйг Накамицү анхааруулав.

Хиймэл оюун ухааныг хөгжүүлэх, ашиглах бүх шатанд олон улсын эрх зүйг сахих ёстой бөгөөд хиймэл оюун ухаантай холбоотой шийдвэрийн хяналт, хариуцлага хүний гарт үлдэх ёстой гэж тэрбээр онцолсон байна.

Түүнчлэн техникийн мэдлэгт тулгуурласан бодлого боловсруулах, яриа хэлэлцээ өрнүүлэх тохиромжтой талбар олох зэрэг тэргүүлэх чиглэлийг Накамицү танилцуулсныг яам мэдээлжээ.