Өмнөд Солонгост тэгш бус байдлын асуудлыг шийдвэрлэх ажлын хэсгийн удирдах бүлэг анхны хуралдаанаа хийлээ

Өмнөд Солонгосын засгийн газар янз бүрийн салбар дахь тэгш бус байдлын асуудлыг шийдвэрлэх шинэ ажлын хэсгийн удирдах бүлгийн анхны хуралдааныг Пүрэв гарагт зохион байгуулсныг Сангийн яам мэдэгджээ.

The Korea Times сонины мэдээлснээр, хуралдааныг Сөүлд Сангийн яамны нэгдүгээр дэд сайд Квон Дэ Ён, Эрүүл мэндийн яамны нэгдүгээр дэд сайд Хён Сү Ёб нар удирдсан байна. Засгийн газар Сангийн сайдаар ахлуулсан ажлын хэсэг байгуулахаа өмнөх өдөр нь зарласан юм.

Ажлын хэсэг нь таван ажлын бүлгийг хянах удирдах бүлгээс бүрдэнэ. Ажлын бүлгүүд хөдөлмөрийн зах зээл, салбар, бүс нутаг, үе хоорондын болон нийгмийн давхаргын тэгш бус байдлын асуудлыг тус тус хариуцна. Ажлын бүлэг бүрийг холбогдох салбарын дэд сайд ахалж, бүлгүүд төрийн судалгааны хүрээлэнгүүдтэй хамтран бодлогын гол зорилтыг тодорхойлох аж.

Ажлын бүлгүүд долоо хоног бүр хуралдах бол удирдах бүлэг сард дор хаяж хоёр удаа хуралдана. Яамдын энэ оны эцэс гэхэд тохиролцох бодлогын арга хэмжээг Өмнөд Солонгосын 2027 оны эдийн засгийн өсөлтийн стратегид тусгахаар төлөвлөжээ.

“Бүгд хамтдаа өсөж байна уу гэдэг асуултад засгийн газар хариулах цаг ирлээ” гэж Квон хэлээд, өнгөрсөн жил байнгын бус ажилчдын цалин томоохон компаниудын байнгын ажилчдынхын дөнгөж 61 хувьтай тэнцэж байсныг онцолжээ. Тэрбээр мөн төсвийн зарцуулалт, татвар, санхүү, зохицуулалтын шинэчлэлийг хамарсан иж бүрэн бодлогын арга хэмжээ боловсруулахад яамд хоорондын хамтын ажиллагааг бэхжүүлэхийг уриалав.