Өмнөд Солонгосын Genesis BBQ Африкт анхны салбараа нээлээ

Дэлхий даяар тэлж буй Өмнөд Солонгосын шарсан тахианы франчайз сүлжээ Genesis BBQ Африкт анхны салбараа нээснээ баасан гарагт мэдэгдлээ.

Хэвлэлийн мэдээнд дурдсанаар, тус компани энэ салбарыг нээхийн тулд өнгөрсөн оны арваннэгдүгээр сард солонгос хоол түгээдэг Өмнөд Африкийн Good Tree компанитай мастер франчайзын гэрээ байгуулжээ. Мастер франчайзын гэрээгээр франчайз эзэмшигч тодорхой нутаг дэвсгэрт салбар нээж, гуравдагч этгээдэд дэд франчайз олгох эрх авдаг.

“Өмнөд Африк дахь салбар нь BBQ-ийн Африк даяар тэлэх стратегийн тулгуур, гол зах зээл болно. Бид орон нутгийн хэрэглэгчдэд тусгайлан тохируулсан солонгос шарсан тахиа, солонгос хоолоор тэднийг татахыг зорьж байна” гэж хэвлэлийн мэдээнд BBQ-ийн тэргүүн Юн Хон Гын дурджээ.

Шинэ ресторан нь бизнес, санхүүгийн томоохон төв болох Йоханнесбург хотод байрлах бөгөөд компанийн онцлог шарсан тахиа болон солонгос хоолнуудыг санал болгоно.

BBQ ирэх жил Өмнөд Африкт үе шаттайгаар шинэ салбарууд нээхээр төлөвлөж байгаа ч Африкийн бусад оронд одоогоор салбаргүй байна.

Genesis BBQ Өмнөд Солонгост 2400 гаруй салбартай бөгөөд АНУ, Канад, Герман, Япон, Тайвань зэрэг 57 оронд 800 орчим салбар ажиллуулдаг. Гадаад дахь салбаруудын 300 орчим нь АНУ-ын 33 мужид байрладаг.