ОУАЭА Өмнөд Солонгосын Пусан дахь цөмийн реакторын аюулгүй ажиллагааг сайжруулахыг зөвлөжээ

Олон улсын атомын энергийн агентлаг (ОУАЭА) Өмнөд Солонгосын Пусан хот дахь цөмийн реакторын ажиллагааны аюулгүй байдлыг, тухайлбал үйлдвэрлэлийн аюулгүй байдал, ажиллагааны журам, цацраг идэвхт бохирдлын хяналтыг сайжруулахыг зөвлөснөө Пүрэв гарагт мэдэгдсэн бөгөөд энэ тухай арваннэгдүгээр сарын 13-нд Вашингтоноос мэдээлэгджээ.

ОУАЭА-ийн ажиллагааны аюулгүй байдлын хяналтын баг Өмнөд Солонгосын засгийн газрын хүсэлтээр аравдугаар сарын 26-наас Пүрэв гараг хүртэл Шин-Гори 2 дугаар реакторт шалгалт хийж, эдгээр зөвлөмжийг гаргажээ. Уг реактор Сөүлээс зүүн өмнө зүгт 330 орчим км-т оршдог.

Баг станцад үйлдвэрлэлийн аюулгүй байдлын зохицуулалтыг бэхжүүлэх, ажиллагааны гүйцэтгэл, хяналтыг сайжруулах, цацраг идэвхт бохирдол тархах эрсдэлийг бууруулах арга хэмжээг чангатгах талаар авч үзэхийг зөвлөжээ.

Ялангуяа үр дүнтэй ажиллагааг хангахын тулд ажиллагааны мэдээллийг үнэн зөв дамжуулж, ашиглах нь чухал болохыг ОУАЭА онцолсон байна.

Зөвлөмж өгсөн хэдий ч станцын ажилтнууд мэргэжлийн ур чадвартай, ажиллагааны аюулгүй байдал, найдвартай байдлыг тасралтгүй сайжруулахад тууштай байгааг агентлаг тэмдэглэжээ.

Баг мөн талбайн болон удирдлагын өрөөний операторууд хамтран дадлага хийх виртуал сургалтын систем, цацраг идэвхт хаягдлыг боловсруулах сайжруулсан арга, гадаад аюулын талаар бодит цагийн анхааруулга өгөх нэгдсэн гамшгийн хяналтын систем зэрэг сайн туршлагыг тодорхойлсон байна.

“Дөчин гаруй жилийн дараа Гори станцад эргэн ирсэн нь Бүгд Найрамдах Солонгос Улс олон улсын харилцан хяналтад удаан хугацаанд оролцож, ажиллагааны аюулгүй байдлыг тасралтгүй сайжруулахад тууштай байгааг харуулж байна” гэж хяналтын багийн ахлагч, ОУАЭА-ийн ажиллагааны аюулгүй байдлын хэлтсийн дарга Юрай Ровны хэлжээ.

Шалгалтын дүгнэлт станцын аюулгүй байдлын соёлыг бэхжүүлэхэд тусална гэж Гори атомын цахилгаан станцын ерөнхий захирал Сон Чан Сү хэлээд, “Цөмийн аюулгүй байдлыг хамгийн тэргүүн ээлжинд тавих бидний байр суурь хатуу хэвээр байна” гэжээ.

2012 онд арилжааны ашиглалтад орсон 1000 мегаваттын даралтат усан реактор Шин-Гори 2-ыг Korea Hydro & Nuclear Power компани ажиллуулдаг.

ОУАЭА-ийн мэдэгдсэнээр, станцын удирдлага тайлангийн төслийг хүлээн авсан бөгөөд агентлаг эцсийн тайлангаа гурван сарын дотор Өмнөд Солонгост хүргүүлэхээс өмнө удирдлага баримтын талаар тайлбараа өгөх боломжтой.