Пентагон Хятадын нууц сансрын онгоцны зургийг нийтлэв

АНУ-ын Батлан хамгаалах яамны Тагнуулын газар 2024 онд арилжааны хиймэл дагуулаар авсан Хятадын дахин ашиглах боломжтой «сансрын онгоцны» зургийг нийтэлжээ. Энэ тухай Би Би Си-гийн орос хэлний алба мэдээлэв. Энэ нь нууц сансрын хөлгийн анхны тод зураг юм. Өмнө нь олон нийтэд нээлттэй зургууд нэлээд бүдэг байсан юм.

Зургийг АНУ-ын Хятад, Орос, мөн цэргийн чиглэлийн сансрын хөтөлбөртэй Хойд Солонгос, Ирантай цэргийн өрсөлдөөний тухай сансрын аюулгүй байдлын сорилтын тайланд нийтэлсэн байна.

Сансрын онгоц нь агааргүй орчинд болон дэлхийн агаар мандалд хоёуланд нь хөдөлж чадах, далавч, сүүлтэй тул агаарт удирдлагатай нисдэг хөлөг юм. Ийм хөлөг тойрог замд янз бүрийн ачаа хүргэх, бусад сансрын хөлөгтэй харилцан ажиллах буюу хяналтын хиймэл дагуулын үүрэг гүйцэтгэх боломжтой. Тэд хиймэл дагуулын эсрэг зэвсэг ч болж болзошгүй.

Тайланд дурдсанаар, сансрын онгоц нь дахин ашиглагддаг, илүү өндөр маневрлах чадвартай тул уламжлалт хиймэл дагуулаас зарим даалгаварт илүү тохиромжтой. Ийм хөлөг агаар мандлын дээд давхаргад орж, далавчаараа чиглэлээ өөрчилснөөр тойрог замынхаа налууг өөрчилж чаддаг нь ердийн хиймэл дагуулд маш их түлш шаарддаг маневр юм.

Тайлангийн дагуу, Хятадын сансрын онгоцны анхны загвар 2020 онд сансарт нисч, тойрог замд хоёр хоног байгаад дэлхийд буцаж ирсэн. 2022 онд хийсэн хоёр дахь нислэг 276 хоног үргэлжилж, Америкийн цэргийнхний үзэж буйгаар энэ үеэр хөлөг Хятадын өөр нэг хиймэл дагуулын ойролцоо маневр хийжээ.

Хөлөг түүнээс нэг километрийн зай барьж байсан ч нэгэн үед 100 метр хүртэл ойртсон байна. 2023 оны 12 дугаар сард Хятад гурав дахь сансрын онгоцоо хөөргөсөн бөгөөд тэрбээр тойрог замд 268 хоног байж, ямар нэг биет гаргаж, түүнтэй харилцан ажилласан гэнэ.

АНУ-д одоо Х-37Б нэг хөлөг тойрог замд нисдэг нууц цэргийн хөтөлбөр хэрэгжиж байгаа бөгөөд уг хөлөг долоон даалгавар гүйцэтгэсний хамгийн урт нь 900 гаруй хоног үргэлжилжээ. Олон мэргэжилтний үзэж буйгаар, Пентагоны нийтэлсэн Хятадын хөлөг гадаад төрхөөрөө Х-37-той маш төстэй юм.