Песков: Гурван талт хэлэлцээр сэргэх нь байлдааны ажиллагааг хязгаарлана гэсэн үг биш

Украины мөргөлдөөнийг зохицуулах гурван талт хэлэлцээрийг сэргээх шийдвэр нь цэргийн ажиллагаанд ямар нэг хязгаарлалт тавина гэсэн үг биш гэж ОХУ-ын Ерөнхийлөгчийн хэвлэлийн төлөөлөгч Дмитрий Песков хэвлэлийн бага хурал дээр мэдэгдсэнийг Ведомости мэдээлэв. Түүний хэлснээр Оросын зэвсэгт хүчин тусгай цэргийн ажиллагаагаа үргэлжлүүлж, Украины цэрэг-аж үйлдвэрийн цогцолбор руу томоохон, тууштай цохилт өгсөөр байна.

Песков Киев ч Оросын эсрэг ажиллагаагаа үргэлжлүүлж байгааг нэмж хэлсэн бөгөөд ингэж тэрбээр хямралыг дипломат замаар шийдвэрлэх гурван талт хэлэлцээрийн бэлтгэл хийгдэж буй үед Украины цэрэг Воронеж муж руу томоохон халдлага хийсэн талаар тайлбар өгсөн юм.

Оросын төмөр замын компани 10-р сарын 26-нд Сомово өртөөнд нисгэгчгүй онгоцны халдлагын үеэр Анапа-Москва чиглэлийн 11 дүгээр зорчигч тээврийн галт тэрэгний вагон эвдэрч, таван зорчигч шархадсан гэж мэдэгдсэн. Цахилгаан тасарсны улмаас Воронеж орчмын хэсэгт галт тэрэгний хөдөлгөөнийг түр зогсоосон ч дараа нь сэргээжээ.

Воронеж мужийн захирагч Александр Гусев шөнө болон өглөө эрт агаарын довтолгооноос хамгаалах хүчин бүс нутгийн дээгүүр 113 нисгэгчгүй онгоц устгаснаас 70 гаруй нь Воронеж хотын дээгүүр байсан бөгөөд онгоцны хэлтэрхий унаснаар хэд хэдэн үйлдвэр, бизнесийн төв, орон сууцны барилгад гал гарсан гэж мэдэгдсэн.