Помпейд Везувийн дэлбэрэлтээс хойш битүүмжлэгдсэн шүүгээнээс үнэртний сав, хүүхдийн хүзүүний зүүлт олджээ

Помпей хотын балгасаас бараг 2,000 жил битүүмжлэгдсэн модон шүүгээ олдож, дотроос нь будаг шунхны багаж, үнэртний сав, зоос, хүүхдийн хүзүүний зүүлт зэрэг хувийн эд зүйлсийн хэлтэрхий илэрчээ. Энэ тухай Гардиан сонин мэдээлэв.

Олдворууд Везувий галт уулын дэлбэрэлтэд сүйрэхээс өмнөх эртний Ромын хотын өдөр тутмын амьдралыг дотно харуулж байна. Шүүгээг Помпейн хамгийн хөл хөдөлгөөнтэй гудамжуудын нэг болох Виа делл Аббонданца дахь байшингийн өрөөнөөс олжээ.

Шүүгээнд хямсаа, шилэн жижиг үнэртний сав, хүж уугиулагч, хүрэл дэнлүү, 38 хүрэл зоос, тогоо, хар тугалган жинтэй модон хайрцаг байсан нь гэрт нь худалдаачин амьдарч байсныг илтгэж байна.

Хамгийн сонирхолтой олдвор бол Бес, Меркурий зэрэг бурхдыг дүрсэлсэн 20 гаруй жижиг сахиустай хүзүүний зүүлт юм. Ийм зүүлтийг хүүхдүүд зүүдэг байсан бөгөөд сахиусны шажигнах дуу эцэг эхэд хүүхдээ хаана байгааг мэдэхэд тусалдаг байжээ.

“Энэ нь магадгүй хол амьдардаг эцэг эхийг нь сануулдаг байсан. Газар дундын тэнгисийн бүс нутгаар олон хүн нүүдэллэж, хувийн эд зүйлсээ дагуулдаг байсан” гэж Помпейн археологийн цогцолборын захирал Габриэль Цухтригель хэлжээ.

Цухтригелийн хэлснээр, мөнгө, хувийн эд зүйлсээ орхисон нь эзэд нь дэлбэрэлтээс гэнэт зугтах болсныг илтгэж болзошгүй. Байшингийн агуулахад байсан ваарнаас хоёр хулганы хагархай араг яс ч олджээ.

Байшингийн фасадыг анх 1912 онд малтсан ч зарим өрөөг одоо л өргөн хүрээний сэргээн засварлах төслийн хүрээнд судалж байна. Помпейд 2025 онд тансаг халуун усны цогцолбор, 2023 онд боолуудыг хорьж талх жигнүүлж байсан гэх талх нарийн боовны газар олдож байсан юм.