Сингапурт бүртгэлтэй таван компани утааны хэргийн үнэлгээнд хамтран ажиллахаар тохиролцов
Индонезийн түймрээс үүдсэн утааны хэрэгт компаниуд оролцсон эсэхийг тусгай зөвлөл үнэлэх юм.
Хил дамнасан утаа үүсгэсэн түймэртэй холбоотой байж болзошгүй Сингапурт бүртгэлтэй таван компани үнэлгээчин томилж, үнэлгээний ажилд хамтран ажиллахаар тохиролцсоныг Үндэсний байгаль орчны агентлаг 10 дугаар сарын 31-нд буюу Бямба гарагт мэдэгджээ. Энэ тухай Си Эн Эй мэдээлэв.
Агентлаг Вилмар Интернэшнл, Голден Агри-Ресорсез, АПП компани, түүний Хятад дахь салбар, Индофүүд Агри Ресорсез компаниудын төлөөлөгчидтэй уулзжээ. Сайн дураар үнэлгээчин томилох хүсэлтэй байгаагаа илэрхийлсэн Кенкана Агри компанитай ч уулзах юм.
«Компаниуд үнэлгээнд сайн дураар оролцох нь баримтыг тогтооход тусална» гэж агентлаг мэдэгджээ.
Агентлаг мөн Индонезид гарч, хил дамнасан утаа үүсгэсэн түймэрт оролцоо, холбоо байгаа эсэхийг тогтоолгохоор мөрдөн шалгах компани, хуулийн фирм хөлслөхөд бэлэн гэдгээ олон нийтэд мэдэгдсэн Ферст Ресорсез компанийн алхмыг сайшаажээ.
Энэ долоо хоногийн эхээр утаа үүсгэсэн түймэртэй холбоотой гэж сэжиглэгдэж буй 10 компанийн удирдлагууд гурван сайдтай уулзсаны дараа Сингапурын мөрдөн байцаалтад бүрэн хамтран ажиллахаа амласан юм. Ерөнхий сайдын орлогч Ган Ким Ён, Ахлах сайд К.Шанмугам, Тогтвортой хөгжил, байгаль орчны сайд Грейс Фу нар компаниудын удирдлагуудад засгийн газрын хүлээлт, утааны бохирдлын буруутныг хариуцлагад татах хуулиа чангатгах төлөвлөгөөг танилцуулжээ.
Хууль зүйн яам, Үндэсний байгаль орчны агентлаг Баасан гарагт хил дамнасан утаатай холбоотой байж магадгүй гэж засгийн газрын тогтоосон компаниудыг үнэлэх мэргэжлийн зөвлөлд долоон гишүүн сонгосныг зарласан байна.
