Тайланд, Бутан гурван баримт бичигт гарын үсэг зурав
Хоёр орон чөлөөт худалдааны хэлэлцээрийг 2027 оны 1 дүгээр сарын 1-нээс хүчин төгөлдөр болгохыг зорьж байна.
Тайландын Ерөнхий сайд, Дотоод хэргийн сайд Анутин Чарнвиракул Бутанд хийж буй албан ёсны айлчлалынхаа үеэр Бямба гарагт Тхимпху хотод хоёр орны гурван баримт бичигт гарын үсэг зурах ёслолд оролцжээ гэж Бангкок Пост сонин мэдээлжээ.
Засгийн газрын хэвлэлийн төлөөлөгч Эккапоб Пианписесийн хэлснээр, баримт бичгүүд мэдлэг, технологийн солилцоог дэмжиж, эмнэлгийн үйлчилгээг сайжруулж, тариаланчид, жижиг бизнест санхүүжилт олгох боломжийг өргөжүүлж, сэргээгдэх эрчим хүчийг хөгжүүлэх зорилготой.
Эрүүл мэндийн яамдын хоорондын санамж бичигт бүх нийтийн эрүүл мэндийн тусламж, өвчнөөс урьдчилан сэргийлэх, эмнэлгийн боловсон хүчин бэлтгэх, дижитал эрүүл мэнд, зайн эмчилгээ, хиймэл оюун ухааны хамтын ажиллагаа, бутан өвчтөнүүдийг Тайландын улсын эмнэлэгт эмчлэх асуудал багтжээ. Хоёр дахь нь Тайландын Хөдөө аж ахуй, хоршооны банк, Бутаны Хөгжлийн банкны санхүүгийн хамтын ажиллагааны шинэчилсэн санамж бичиг юм.
Гурав дахь баримт бичгээр Тайландын Хөрш орнуудын эдийн засгийн хөгжлийн хамтын ажиллагааны агентлаг, Бутаны Сангийн яам, Норион Ринюэбл Энержи компани Бутаны Тарейтанг дахь 100 мегаваттын нарны-хөдөө аж ахуйн төслийн техник эдийн засгийн үндэслэл, зураг төслийг хянахад техникийн туслалцаа үзүүлэх юм.
Гарын үсэг зурахаас өмнө 10 дугаар сарын 30-нд Анутин Бутаны Ерөнхий сайд Цэринг Тобгайтай хэлэлцээ хийж, худалдаа, хөрөнгө оруулалт, дэд бүтэц, эрүүл мэнд, боловсрол, цэвэр эрчим хүчний салбарт хамтын ажиллагааг өргөжүүлэхээр тохиролцжээ. Хоёр тал 2027 оны 1 дүгээр сарын 1-нээс хүчин төгөлдөр болно гэж найдаж буй чөлөөт худалдааны хэлэлцээрийн ахицыг сайшаасан байна.
