Тайландын Пхукет арлыг аадар бороо, шавар чулуу дайрав

Тайландын Пхукет арал дээр 24 цагийн дотор 142.8 миллиметр хүртэл бороо орж, Кату дүүргийн Патонг тосгоны хороолол, үзвэрийн газруудыг үерийн ус сүйтгэснийг Bangkok Post мэдээлэв. Дэлгүүрүүдийн цонх хагарч, олон машин усанд автжээ.

Патонгийн захиргаа нэрвэгдсэн айл өрхүүдэд оффис, сургууль, зочид буудалд түр хоргодох байр нээж, ажилчид чулуу, шавар, хуримтлагдсан хогийг цэвэрлэж байна. Аадар бороо Муанг, Таланг дүүргийн зарим хэсэгт ч гэнэтийн үер үүсгэжээ.

Гамшгаас урьдчилан сэргийлэх газрын мэдээлснээр Даваа гарагийн өглөөний байдлаар Пхукет үерт нэрвэгдсэн өмнөд мужуудын нэг бөгөөд Транг, Сатун, Накхон Си Таммарат мужид ч үер болсон байна.

Цаг уурын газрын урьдчилсан мэдээгээр муссоны хотгор хүчирхэгжиж байгаа тул өмнөд бүсэд Лхагва гараг хүртэл хүчтэй бороо үргэлжилж, Пүрэвээс Бямба гараг хүртэл зүүн эргээс бусад хэсэгт бороо сулрах төлөвтэй байна.