Тайванийн хоолойн энх тайвныг хэн алдагдуулж байна вэ? Тайванийн Эх газрын асуудал эрхэлсэн зөвлөлийн судалгаагаар тайваньчуудын талаас илүү нь Хятадын Коммунист намыг заажээ

Тайванийн Эх газрын асуудал эрхэлсэн зөвлөлийн шинээр нийтэлсэн санал асуулгаар тайваньчуудын талаас илүү нь Тайванийн хоолойн энх тайвныг Хятадын Коммунист нам алдагдуулж байна гэж үзжээ. Иргэдийн 10 хүн тутмын бараг 9 нь Хятадын “энхийн замаар нэгтгэх, нэг улс хоёр тогтолцоо”-г хүлээн зөвшөөрөхгүй байгаа бол 10 хүн тутмын 8 нь Тайванийн засгийн газар батлан хамгаалахын төсвийг нэмэгдүүлж, өөрийгөө хамгаалах чадавхаа бэхжүүлэхийг дэмжиж, мөн Хятад гадаадын этгээдээр дамжуулан Тайваньд хууль бус гэмт хэрэг үйлдэхээс сэргийлэх хуулийн өөрчлөлтийг засгийн газар хийхийг дэмжиж байна. Тус зөвлөл Бээжингийн эрх баригчдыг энэ үр дүнг бодитоор хүлээн авч, Тайванийн ард түмний сонгосон засгийн газартай яриа хэлэлцээ хийхийг уриалав.

Эх газрын асуудал эрхэлсэн зөвлөл Пүрэв гарагт (10 дугаар сарын 22) 10 дугаар сарын 15-аас 17, мөн 19-нд явуулсан санал асуулгын дүнг нийтэлсэн бөгөөд үүгээр оролцогчдын 52.3 хувь нь Тайванийн хоолойн энх тайвныг Хятадын Коммунист нам алдагдуулж байна гэж үзжээ. 88.3 хувь нь “‘Энхийн замаар нэгтгэх, нэг улс хоёр тогтолцоо’ хэрэгжвэл эрх чөлөө, ардчиллаа алдсан ч хамаагүй” гэсэн байр суурийг хүлээн зөвшөөрөхгүй байна. 49.3 хувь нь Хятадын саяхан хэрэгжүүлж эхэлсэн, тухайн хүнийг улсаас гарахыг хязгаарлаж болох хил нэвтрэх журам нь Хятад руу явах хүсэлд нь нөлөөлнө гэж үзэж байна.

Үүнээс гадна оролцогчдын 92 хувь нь “Тайванийн ирээдүйг 23 сая ард түмэн хамтдаа шийдэх ёстой” гэдгийг, 86 хувь нь “Тайванийн хувьд одоо хамгийн чухал зүйл бол Тайванийн хоолойн энх тайван, тогтвортой байдлын өнөөгийн нөхцөлийг хадгалах” гэдгийг дэмжжээ. 78.8 хувь нь “Бүгд Найрамдах Хятад Улс болон Бүгд Найрамдах Хятад Ард Улс бие биедээ харьяалагддаггүй” гэдэгтэй санал нийлж, 80.6 хувь нь Тайванийн засгийн газар батлан хамгаалахын төсвийг нэмэгдүүлж, өөрийгөө хамгаалах чадавхаа бэхжүүлэхийг дэмжсэн бол 80.2 хувь нь Хятад гадаадын этгээдээр дамжуулан Тайваньд хууль бус гэмт хэрэг үйлдэхээс сэргийлэх хуулийн өөрчлөлтийг засгийн газар хийхийг дэмжжээ.

Эх газрын асуудал эрхэлсэн зөвлөлийн хэлснээр, судалгааны үр дүн Тайванийн ард түмэн засгийн газрын хоолойн хоёр эргийн бодлогын байр суурь, өөрийгөө хамгаалах чадавхаа бэхжүүлэх, хил дамнасан хэлмэгдүүлэлтийг сөрөх арга хэмжээ болон “Хятадын Коммунист намын ‘энхийн замаар нэгтгэх, нэг улс хоёр тогтолцоо’ хэмээх улс төрийн байр суурийг эрс эсэргүүцэх” байр суурийг дэмжиж байгааг харуулж байна. Тус зөвлөл Бээжингийн эрх баригчдыг Тайванийн олонхын санаа бодол болон хоолойн хоёр эрэг бие биедээ харьяалагддаггүй гэсэн бодит үнэнийг бодитоор хүлээн авч, Тайваньд үзүүлж буй албадлага, дарамтаа зогсоохыг уриалав. Мөн тэгш эрх, нэр төрийн зарчмаар Тайванийн ард түмний сонгосон хууль ёсны засгийн газартай урьдчилсан нөхцөлгүйгээр харилцан ярилцаж, санал зөрөлдөөнөө шийдвэрлэн, Тайванийн хоолой болон бүс нутгийн энх тайвныг хамгаалах хамтын хариуцлагаа хүлээхийг хүсэв.

Тайванийн 20 ба түүнээс дээш насны насанд хүрэгчдийн дунд явуулсан, хүчинтэй 1073 түүвэр бүхий энэхүү судалгаагаар оролцогчдын 46.3 хувь нь мэдээллийг голчлон олон нийтийн сүлжээнээс авдаг бол дараагийн байрт телевиз эсвэл радио (40.9 хувь) орж байна. Олон нийтийн сүлжээнүүдээс эхний 3 байрыг Facebook (42.1 хувь), Youtube (17.1 хувь), Threads (16.8 хувь) эзэлжээ. Оролцогчдын намын харьяаллын хувьд Тайванийн гол намуудаас Ардчилсан дэвшилтэт нам хамгийн олон буюу 40.4 хувийг эзэлж, удаад нь Гоминьдан 15.6 хувь, Тайванийн ард түмний нам 4.6 хувьтай байна.