Трамп Ливийг хууль бус цагаачлалын коридор байхаа нэн даруй зогсоохыг анхааруулав

АНУ-ын Ерөнхийлөгч Дональд Трамп Ливийн ард түмний тэсвэр хатуужил, Вашингтонтой хийсэн терроризмын эсрэг хамтын ажиллагааг магтахын зэрэгцээ Хойд Африкийн энэ улс хууль бус цагаачлалын гол дамжин өнгөрөх зам байхаа нэн даруй зогсоох ёстой гэж мэдэгдсэнийг Hindustan Times мэдээлэв. Трамп өөрийн олон нийтийн сүлжээнд нийтэлсэн мэдэгдэлдээ хоёр орны Исламын улс бүлэглэлийн эсрэг хамтран тэмцсэн түүхийг онцолжээ.

Тэрбээр хоёр ард түмний нийтлэг дайсан болох Исламын улсын эсрэг тулалдсан Ливичүүдийн золиослолыг хүндэтгэдэг ч Ливи хууль бус цагаачлалын коридор хэвээр үлдэж болохгүй бөгөөд үүнийг одоо зогсоох ёстой гэж хэлэв.

Трамп Ливийн удаан хүлээгдсэн нэгдэл, төрийн байгууллагуудыг нэгтгэх ажлыг дэмжиж, Ливийн ард түмэн үндэсний сонгуульд амжилттай шилжихэд хамт байхаа илэрхийлжээ. Тэрбээр мөн Ливийн дотоод хэрэгт гадны оролцоог зогсоохыг уриалж, Ливийн ард түмэн олон жил терроризм, гадны хөндлөнгийн оролцооны хохирогч болсон тул нэгдэж, бүрэн эрхээ эргүүлэн авахыг хүсэж байгаагаа хэлэв.

Үүнээс өмнө Бямба гарагт Жоржиа мужийн Перри хотод Бүгд найрамдах намын нэр дэвшигчдийг дэмжих жагсаал дээр Трамп Гаитид түр хамгаалалтын статус олгох хуулийн төслийг дэмжсэн Ардчилсан намын сенатор Жон Оссоффыг шүүмжилж, Ливи, Йемен, Гаити, Сомали зэрэг орныг доромжилсон өмнөх маргаантай үгээ дахин хэлсэн юм. Тэрбээр мөн АНУ-д амьдардаг сомаличуудын 98 хувь нь ажил хийдэггүй гэж нотлох баримтгүйгээр мэдэгджээ.