Трамп Путин, Зеленскийтэй удахгүй уулзаж болох тухай мэдэгдэв

АНУ-ын Ерөнхийлөгч Дональд Трамп Украины мөргөлдөөнийг зохицуулахад томоохон ахиц гарсныг мэдэгдэж, ОХУ-ын Ерөнхийлөгч Владимир Путин, Украины удирдагч Владимир Зеленскийтэй удахгүй уулзах боломжтойг хэлжээ. Энэ тухай Ведомости сонин мэдээлэв.

«Орос, Украины асуудлаар бид томоохон ахиц гаргаж байна. Удахгүй уулзалт болно» гэж Трамп Мэрилэнд муж дахь Эндрюс агаарын баазад сэтгүүлчдэд хэлэв. Тэрбээр уулзалтын оролцогчдыг тодруулахад Путин, Зеленскийг нэрлэжээ.

10 дугаар сарын 27-нд ОХУ-ын Ерөнхийлөгчийн туслах Юрий Ушаков Путин, Зеленскийн уулзалт нь хэлэлцээний үйл явц дуусч, мөргөлдөөнийг урт хугацаанд зохицуулах баримт бичиг бэлэн болсны дараа утга учиртай болно гэж мэдэгдсэн. Түүний хэлснээр, Украины удирдагч шууд хэлэлцээ хийхээр Москвад ирж болох бөгөөд түүнд аюулгүй байдлын шаардлагатай нөхцөлийг бүрдүүлнэ. Мөн өдөр ОХУ, АНУ, Украины гурван талт хэлэлцээг сэргээх огноо хараахан тохирогдоогүй, уулзах боломжит газар нь Абу-Даби гэж Ерөнхийлөгчийн хэвлэлийн төлөөлөгч Дмитрий Песков хэлсэн юм.

10 дугаар сарын 22-нд ОХУ-ын Гадаад хэргийн дэд сайд Сергей Рябков Путин, Трамп, Зеленскийн уулзалтыг зохион байгуулах асуудлыг боловсруулж байгаа ч эцсийн тохиролцоо хараахан алга гэж мэдэгдсэн. Өмнө нь Москва 11 дүгээр сард шинжээчдийн түвшинд гурван талт хэлэлцээг сэргээхэд бэлэн гэдгээ илэрхийлж байжээ.