Цагаан сүүлт бүргэдийг дахин нутагшуулах нь далайн шувуудын колонийг устгаж болзошгүйг шинжээчид анхааруулжээ

Англи, Уэльсэд цагаан сүүлт бүргэдийг дахин нутагшуулах нь ховордсон далайн шувуудын популяцид аюул учруулж, зарим колонийг бүрмөсөн устгаж болзошгүйг экологичид, байгаль хамгаалагчид анхааруулж байгааг Гардиан сонин мэдээлжээ.

Олон тооны бүргэд суллавал далайн тоть зэрэг хадан эрэгт үүрлэдэг далайн шувуудын үржлийн популяци огцом буурч магадгүй гэж зарим эрдэмтэд үзэж байна.

«Цагаан сүүлт бүргэдийг дахин нутагшуулах гэсэн догдлол, урам зоригийн дунд эдгээр шувуу манай далайн шувуудын колонийг устгах магадлалтай гэдгийг огт анзаараагүй бололтой» гэж Шеффилдийн их сургуулийн хүндэт профессор Тим Биркхед хэлсэн байна.

1918 онд Их Британид устаж үгүй болсон цагаан сүүлт бүргэдийг сүүлийн хэдэн арван жилд эргүүлэн нутагшуулсан нь байгаль хамгааллын томоохон амжилт байсан. Гэвч Эксмурт ирэх гурван жилд суллах 20 залуу шувуун дээр нэмээд Өмнөд Уэльсийн Гвентэд 60 хүртэл бүргэд суллах санал байгальд дурлагсдыг хоёр хуваажээ.

Өнгөрсөн сард Эксмураас суллагдсан бүргэдүүдийн нэг далайн шувуудын нэрт дархан газар болох Скомер арлын дээгүүр нисч байгаа нь харагдсан.

Их Британийн далайн шувууд сүүлийн таван жилд бусад бүх бүлгийн шувуудаас илүү хорогдож, тоо толгой нь тавны нэгээр буурсан ч Өмнөд Уэльсийн далайн шувууд харьцангуй эрүүл байдаг.

Гвентийн төслийг удирдаж буй Усны шувуу, намгархаг газрын сангийн профессор Жефф Хилтон бүргэдүүд сэг зэм, загас, жижиг хөхтөн амьтан иддэг тул ганц зүйлийн популяцид мэдэгдэхүйц нөлөө үзүүлэхгүй гэж үзэж байна. Тэдний зорилго ирэх 10 жилд долоогоос есөн хос бүргэд үржүүлэх юм.

Уэльсийн Байгалийн нөөцийн байгууллага Гвентэд бүргэд суллах өргөдлийг хянаж байгаа бөгөөд энэ оны эцэс гэхэд шийдвэр гаргах төлөвтэй.