Уиткофф Украиныг Оросын газрын тос боловсруулах үйлдвэр рүү цохилт өгөхөө зогсоохыг шаарджээ

АНУ-ын Ерөнхийлөгчийн тусгай элч Стив Уиткофф Украины Ерөнхийлөгчийн тамгын газрын дарга Кирилл Будановоос Оросын газрын тос боловсруулах үйлдвэрүүд рүү цохилт өгөхөө зогсоохыг шаардсан гэж Францын Ле Монд сонин эх сурвалжид тулгуурлан бичжээ. Энэ яриа 10 дугаар сарын 9-нд Флоридад болсон хурцадмал хэлэлцээний үеэр болсон гэж Ведомости сонин мэдээлэв.

Ле Монд сонины бичсэнээр, Уиткофф Украины төлөөлөгчдөд бүс нутгийн хөгжил цэцэглэлтийн төлөвлөгөө танилцуулсан бөгөөд мөргөлдөөн дууссаны дараа Оросын газрын тос, байгалийн хийг Украинаар дамжуулан Европ руу дахин нийлүүлэхээр тусгасан байжээ. Ингэснээр Киев дамжин өнгөрөх тээврээс орлого олж, Европын орнууд эрчим хүчний зардлаа бууруулна гэж үзсэн байна.

Буданов Украины чиглэл бол Беларусь биш, Польш гэж эсэргүүцээд, Владимир Зеленскийтэй ярихаар хэлэлцээг завсарлуулжээ. Уулзалт дахин эхлэхэд Украины төлөөлөгчдөд Орос, АНУ-ын хооронд дизель түлш нийлүүлэх тухай тохиролцооны баримт бичгийг үзүүлсэн байна. «Дизелийн энэ хэлцлийг зөвшөөрч, Оросын газрын тос боловсруулах үйлдвэрүүд рүү цохилт өгөхөө зогсоо, та нар дэлхийг аюулд оруулж байна!» гэж Уиткофф хэлсэн гэж Ле Монд бичжээ.

Файнэншл Таймс сонин 10 дугаар сарын 10-нд Москва, Вашингтоны дизель түлшний хэлцлийг зарласны дараа Украины төлөөлөгчид АНУ-д хийх айлчлалаа хугацаанаас нь өмнө дуусгасныг мэдээлсэн. Сонины мэдээлснээр, Америкийн хэлэлцээчид Украин Оросын газрын тос боловсруулах үйлдвэрүүд рүү халдсаар байвал тагнуулын мэдээлэл солилцохоо зогсооно гэж Киевт сүрдүүлжээ.

Мөн Файнэншл Таймс 10 дугаар сарын 11-нд Вашингтон Украинд зориулан Америкийн зэвсэг худалдан авах механизмыг хааж болзошгүйг мэдээлсэн юм. Уиткофф 10 дугаар сарын 21-нд Оросын Ерөнхийлөгч Владимир Путинтэй уулзахдаа Америкийн болон дэлхийн зах зээлд дизель түлш нийлүүлэх тохиролцооны төлөө Дональд Трампын нэрийн өмнөөс талархал илэрхийлжээ.