Узбекистаны 27 сая иргэний мэдээлэл алдагдсан гэх мэдэгдлээсээ хакерууд буцжээ

Баттерфляй нэртэй хакерын бүлэг Узбекистаны 27 сая гаруй иргэний мэдээлэлд нэвтэрсэн гэх мэдэгдлээсээ буцсан гэж Таймс оф Сентрал Эйша сайт мэдээлэв.

Бүлэг 11 дүгээр сарын 1-нд паспорт, хаяг, утас, биометрийн зураг авсан гэж мэдэгдэж, Дижитал технологийн сайд Шерзод Шерматовын утасны дугаарыг нийтэлсэн юм. Мэдээллийн санг зарна гэж ч заналхийлж байжээ.

Бүлэг 11 дүгээр сарын 3 гэхэд өөрсдийгөө цагаан малгайт хакер гэж тодорхойлж, мэдээлэл хулгайлаагүй, зөвхөн сул талыг харуулсан гэж мэдэгдсэн байна. Яагаад зарна гэж заналхийлснээ тайлбарлаагүй аж.

Шерматов 11 дүгээр сарын 4-нд алдагдлыг баталгаажуулалгүйгээр хуучирсан мэдээллийн системийн эмзэг байдлыг анхааруулжээ.

Үүнээс тусдаа сэтгүүлчид интернетэд тараагдсан мэдээллийн санд өөрийн мэдээллийг олж, Дотоод хэргийн яам 10 дугаар сарын 29-нд шалгалт зарласан юм. Хоёр хэргийн хооронд холбоо тогтоогдоогүй байна.

Энэ оны 2 дугаар сард мөн 15 сая иргэний мэдээлэл алдагдсан гэсэн мэдээлэл гарсан ч эрх баригчид энэ хэмжээг батлаагүй, ойролцоогоор 60,000 бүртгэл хамаарч болзошгүй гэж урьдчилан тооцоолж байв.