Узбекистаны Фергана мужид долоо хоногт угаарын хийд 12 хүн амиа алджээ

Узбекистаны Фергана мужид 10 дугаар сарын 25, 11 дүгээр сарын 1-нд болсон хоёр хэрэгт угаарын хийнд хордож 12 хүн, тэр дундаа гурван хүүхэд амиа алджээ гэж Газета.уз сайт мужийн Онцгой байдлын газрыг иш татан мэдээлэв.

Эхний хэрэг Фергана дүүргийн Чимён тосгонд гарч, нэг гэр бүлийн долоон гишүүн амиа алдсан байна.

Хоёр дахь хэрэг Коканд хотын орон сууцанд гарч, эмэгтэй, түүний охин, 1, 3, 7 настай гурван ач зээ нь газар дээрээ нас барсан гэж Ерөнхий прокурорын хэвлэлийн төлөөлөгч хэлжээ.

Газрын мэдээлснээр, халаалтын төхөөрөмж ашиглах аюулгүй ажиллагааг ноцтой зөрчсөн нь гол шалтгаан болжээ.

Германд ашиглалтаас гарсан хуучин халаагуурыг зарим бизнес эрхлэгч сэлбэг гэж хууль бусаар оруулж ирж, гар аргаар засаад шинэ мэт зардаг гэж газар мэдэгдсэн байна.

Тэдгээрийг анхны утааны хоолойгүй оруулж ирж, оронд нь халуун утаанд зориулагдаагүй полиэтилен бохирын хоолой тавьдаг аж.

Газар иргэдийг халаалтын системээ мэргэжилтнээр шалгуулж, баталгаагүй төхөөрөмж хэрэглэхгүй байхыг уриалжээ.

Өмнө нь Ташкентийн Мирзо-Улугбек дүүрэгт баригдаж буй хувийн байшинд зургаан хүний цогцос олдож, хоёр хүн хүнд байдалтай эмнэлэгт хэвтсэн юм.