Япон-Хятадын харилцаа хүйтэрч, Японы компаниуд Хятадаас гарсаар байна

Тэйкоку Датабанк компанийн судалгаагаар 2026 оны 6-р сарын байдлаар Хятадад үйл ажиллагаа явуулж буй Японы компани 10,118 байсан нь 10,778 компани байсан анхны судалгааны жил буюу 2010 оноос хойших хамгийн бага тоо болсныг Nippon.com мэдээлэв. Энэ нь 2024 оны өмнөх судалгааныхаас 20 гаруй хувиар, 2012 оны оргил үеэс 30 орчим хувиар бага юм.

Есөн дэх удаагийн судалгаа Хонконг, Макаог оролцуулалгүйгээр Хятадад үйл ажиллагаа явуулж буй компани бүрийн үйл ажиллагааг шинжилсэн бөгөөд Япон-Хятадын харилцаа муудаж буй нөхцөлд Японы компаниудын Хятад дахь үйл ажиллагаа тодорхой агшиж байгааг харуулжээ. Өмнөх судалгаанаас хойших хоёр жилд 1,221 компани охин компани, үйлдвэр, төлөөлөгчийн газар байгуулж Хятадын зах зээлд шинээр орсон бол 4,137 компани гарсан буюу байршил нь тогтоогдохгүй болсноор цэвэр бууралт 2,916 компани болсон байна.

Шанхай 3,961 Японы компанитайгаар буюу нийт компанийн 40 орчим хувийг эзэлж тэргүүлсэн хэвээр байгаа ч өмнөх судалгаатай харьцуулахад компанийн тоо 1,085 буюу 21.5 хувиар буурчээ. Жилийн борлуулалт багатай жижиг, дунд үйлдвэрүүдийн эзлэх хувь буурч, том компаниудын эзлэх хувь нэмэгдсэн байна.

Салбараар нь авч үзвэл боловсруулах үйлдвэрлэл 4,206 компанитай буюу нийтийн 40 орчим хувийг эзэлж тэргүүлсэн бол бөөний худалдаа 3,320, үйлчилгээ 1,213 компанитай байгаа бөгөөд эдгээр гурван салбар нийт компанийн 86 хувийг бүрдүүлжээ. Санхүү, даатгалын салбарын компанийн тоо өмнөх судалгааны 414-өөс 343 болж буурсан ч Шанхай Хятад болон Азийн санхүүгийн төв хэвээр байгааг харуулж байна.