Японы Ерөнхий сайд Такаичи АСЕАН-ы дээд хэмжээний уулзалтын үеэр Трамптай ярилцахыг хүсэж байна

АНУ, Хятад, Оросын удирдагчдын уулзалт 19-нд Хятадад болж, дэлхий дахины цөмийн зэвсгийг цөөрүүлэх асуудлыг хэлэлцэнэ гэж Цагаан ордны хэвлэлийн төлөөлөгч 13-ны өдөр зарлав. Энэ нь түүхэнд анх удаа болох гурван талын дээд хэмжээний уулзалт юм.

Мэдээллээс үзэхэд, энэ сарын дундуур Филиппиний Манила хотод Зүүн өмнөд Азийн орнуудын холбооны (АСЕАН) хүрээний дээд хэмжээний уулзалтууд болох бөгөөд Японы засгийн газар энэ үеэр Ерөнхий сайд Такаичи Санаэ, АНУ-ын Ерөнхийлөгч Трамп хоёрыг ярилцуулахыг АНУ-д санал болгож байна. Японы тал мөн Филиппинд байх хугацаандаа Япон, АНУ, Австрали, Энэтхэгийн хамтын ажиллагааны “Дөрвөн талт аюулгүй байдлын яриа хэлэлцээ” буюу QUAD-ын дээд хэмжээний уулзалт хийхээр зохицуулж байна.

Такаичи, Трамп хоёр уулзвал Японы тал Хятад, Оросыг хэрхэн харах талаар АНУ-тай зөвлөлдөж, байр сууриа уялдуулахыг хүсэж байгаа аж.

АНУ, Хятад, Оросын удирдагчдын уулзалт холбоотнуудын хүсэл сонирхлыг үл тоосон их гүрнүүдийн шууд наймаа болж хувирч болзошгүй гэж Японы засгийн газар үзэж байна. Токио энэ талаарх санаа зовнилоо АНУ-д илэрхийлсэн гэх мэдээлэл байна. АНУ-ын тал “Японы санаа зовнилыг бүрэн ойлгож байна” гэж хариулсан гэнэ.

Японы засгийн газар энэ алхмыг Ялтын бага хуралтай зүйрлэж, болгоомжилж байна. Дэлхийн хоёрдугаар дайны төгсгөлд буюу 1945 онд болсон энэ хуралд АНУ, Их Британи, ЗХУ-ын удирдагчид дайны дараах асуудал, нөлөөллийн хүрээний талаар тохиролцсон юм. АНУ, Хятад, Орос гурав хөрш болон холбогдох орнуудын хүсэл сонирхлыг үл тоон, тэднийг тойрч олон улсын дэг журам, нөлөөллийн хүрээг дахин тодорхойлох “Ялта 2.0” нөхцөл үүсэж болзошгүй гэж Япон санаа зовж байна.

АНУ Зүүн хойд Азийн холбоотнуудынхаа ашиг сонирхлыг харгалзахгүйгээр Хятад, Оростой зөвхөн өөртөө ашигтай хэлэлцээ хийж, барууны үнэт зүйлсийн суурь, Энэтхэг-Номхон далайн бүс нутагт өгсөн амлалтаа үгүй хийж мэдэх вий гэж Японы засгийн газар болгоомжилж байгаа аж.

Ерөнхий сайд Такаичи Санаэ 11 дүгээр сарын 16-19-нд Филиппиний Манила, Хятадын Шэньжэнь хотод айлчилж, АСЕАН-тай холбоотой дээд хэмжээний уулзалтууд болон Ази, Номхон далайн эдийн засгийн хамтын ажиллагааны (APEC) удирдагчдын уулзалтад оролцохоор төлөвлөжээ.

Такаичи Шэньжэнь хотод APEC-ийн удирдагчдын уулзалтад оролцож, худалдаа, хөрөнгө оруулалт, бүс нутгийн эдийн засгийн интеграц, эдийн засаг болон эрчим хүчний тэсвэржилт, дижитал эдийн засаг, хиймэл оюун ухаан зэрэг асуудлаар Японы байр суурь, бодлогын арга хэмжээг танилцуулна.