Египет Газар дундын тэнгисээс 200 тэрбум шоо фут нөөцтэй байгалийн хийн орд илрүүлжээ

Египет Газар дундын тэнгисээс байгалийн хийн шинэ орд илрүүлж, урьдчилсан тооцоогоор Насим-1Х хайгуулын цооногийн хуримтлалд ойролцоогоор 200 тэрбум шоо фут хий байгааг зарласныг Евроньюс телевиз мэдээлжээ.

Газрын тос, ашигт малтмалын яамны баасан гарагт мэдэгдснээр, Тайба концессын талбайд байрлах цооногт өрөмдлөг, үнэлгээний ажил хийхэд 15 орчим метр цэвэр зузаантай хий агуулсан давхарга илэрсэн байна.

Олборлож болох хэмжээ, өдрийн олборлолтын түвшин, ордын арилжааны үр ашгийг тогтоох техникийн судалгаа үргэлжилж байна. Яам олборлолт эхлэх хугацааг зарлаагүй.

Египет цооногийг 22 орчим километр урт хоолойгоор Абу Мади - Эль Гамил хоолойд холбож, одоо байгаа дэд бүтцийг ашиглан олборлолтыг эрт эхлүүлэхээр төлөвлөжээ.

Тайба концессыг Италийн Эни компани Австралийн Вудсайд компанитай хамтран эзэмшдэг бөгөөд өрөмдлөгийг Египетийн Петробел компани хийсэн.

Яам амжилттай үр дүнг хөрөнгө оруулалт, хайгуулын ажил нэмэгдсэн, хөрөнгө оруулалтын орчин сайжирч, гадаадын эрчим хүчний компаниудад төлөх хугацаа хэтэрсэн өрийг барагдуулахад ахиц гарсантай холбон тайлбарлав.

Сүүлийн жилүүдэд олборлолт буурсны улмаас Египет дотоодын хэрэгцээгээ хангахын тулд импортын хийнээс улам хамааралтай болсон юм.