Египетийн арми Судантай хиллэх нутагт хууль бусаар алт олборлогч олон зуун хүнийг баривчилжээ

Египетийн армийн төлөөлөгч Ахмед Этман цэргийн ажиллагаагаар 151 египет, 540 гадаадын иргэнийг баривчилснаа Пүрэв гарагт мэдэгдсэнийг Африканьюс телевиз мэдээлжээ.

Ажиллагаа эхлэхээс өмнө 6000 гаруй хүн өөрсдөө бууж өгсөн гэж тэрбээр хэлжээ. Арми Судантай хилийн ойролцоо хууль бус алт олборлогчид ажиллаж буйг харуулсан гэх зургуудыг нийтэлжээ.

10 дугаар сард Судан, Египетийн хил дээрх алтны уурхайд агаараас цохилт өгч, дор хаяж 72 алт олборлогч амь үрэгдсэн. Хүний эрхийн нэгэн байгууллага уг халдлагыг Египетийн Агаарын цэргийн хүчин үйлдсэн гэж буруутгасан юм.

Этман ажиллагааг баталгаажсан тагнуулын мэдээлэлд үндэслэн зэвсэг, сумны агуулахыг нисгэгчгүй онгоцоор онилсон гэж тайлбарлаад «энгийн иргэдийг онилоогүй» гэж хэлжээ.

Тэрбээр 10 дугаар сарын цохилтын тухай ярьж байсан эсэх нь тодорхойгүй байна.

Суданы дайнд алт гол үүрэг гүйцэтгэж байна. Шуурхай дэмжлэгийн хүчин хэмээх зэвсэгт бүлэглэл Дарфур, Кордофан мужаас олон мянган тонн алтыг хууль бусаар гаргаж, санхүүжилтээ олдог. НҮБ-ын шинжээчдийн 2024 оны тайланд дурдсанаар Суданд олборлосон алтны 50 гаруй хувийг хууль бусаар гаргажээ.