Юн Сок Ёлын сонгуулийн хуулийн хэргийн давж заалдах шатны шийдвэрийг шууд дамжуулна

Өмнөд Солонгосын экс Ерөнхийлөгч Юн Сок Ёлын сонгуулийн хууль зөрчсөн хэргээр ял оноох давж заалдах шатны шүүх хуралдааныг ирэх долоо хоногт шууд дамжуулахаар болжээ. Энэ тухай Кореа Таймс сонин шүүхийн албан тушаалтнуудад тулгуурлан мэдээлэв.

Сөүлийн Дээд шүүх лхагва гарагийн үдээс хойш 2 цагт товлосон уг хуралдааныг телевизүүдэд дамжуулахыг зөвшөөрсөн байна.

Дүүргийн шүүх долдугаар сард Юнд 18 сарын хорих ял оноож, гурван жилээр тэнсэн харгалзсан юм. Түүнийг 2022 оны гуравдугаар сарын ерөнхийлөгчийн сонгуулийн өмнөх сурталчилгааны үеэр худал мэдэгдсэн гэж үзсэн. Юн тэр сонгуульд Ардын хүч намаас нэр дэвшиж ялсан.

Тэрээр 2021 оны арванхоёрдугаар сарын хэвлэлийн арга хэмжээн дээр татварын албаны нэгэн хуучин ажилтанд өмгөөлөгч танилцуулж байгаагүй хэмээн худал мэдэгдсэн гэж буруутгагдаж байна. Тэр хуучин ажилтан нь Юны прокурорт ажиллаж байх үеийн дотны хүн, ахлах прокурор асан Юн Дэ Жиний ах юм.

Мөн Юн 2022 оны нэгдүгээр сард өгсөн ярилцлагадаа бөө Жон Сон Бэтэй намын нэгэн албан тушаалтан өөрийг нь танилцуулсан гэж мэдэгдэн, эхнэр Ким Гон Хитэйгээ хамт Жонтой уулзсан гэдгийг үгүйсгэсэн нь худал гэж буруутгагдаж байна.

Долдугаар сард оноосон ял нь Юны сонгуулийн ялалтыг хүчингүй болгож, намыг нь нөхөн олгосон зардлаа буцаан төлөхөд хүргэх хэмжээний хүнд байв.

Давж заалдах шүүх ялыг хэвээр үлдээж, улмаар Улсын дээд шүүхээр эцэслэгдвэл Ардын хүч нам улсад 39.7 тэрбум вон буюу 29.7 сая ам.доллар буцаан төлөх ёстой.

Сонгуулийн хуулиар нэр дэвшигч нь дор хаяж 15 хувийн санал авсан намд улсаас сурталчилгааны зардлыг нөхөн олгодог. Харин нэр дэвшигч сонгуулийн хууль зөрчсөнөөр эцэслэгдсэн хорих ял, эсвэл 1 сая воноос доошгүй торгууль авбал нам нөхөн авсан бүх мөнгөө буцаан өгөх үүрэгтэй.