АНУ-тай яриа хэлэлцээ хийх нь заавал биш гэж Ким Ё Жон мэдэгдэв

АНУ-тай яриа хэлэлцээ хийх нь энх тайвны сонголтын нэг боловч үндэсний ашиг сонирхолд заавал шаардлагагүй гэж Хойд Солонгосын удирдагчийн эгч Ким Ё Жон Лхагва гарагт мэдэгджээ. Энэ тухай Кореа Таймс сонин мэдээлэв.

«Энх тайвны сонголтод яриа хэлэлцээ мэдээж багтана, гэхдээ энэ нь бидний хувьд үндэсний ашиг сонирхолтой заавал адилтгагдахгүй» гэж тэрбээр албан ёсны Төв телеграф агентлагаар түгээсэн мэдэгдэлдээ дурдсан байна.

Хойд Солонгос Бинанс биржээс 6 тэрбум ам.доллараас илүү криптовалют хулгайлсан гэсэн Холбооны мөрдөх товчооны дүгнэлтийг тэрбээр өмнөх өдөр нь няцаасан юм. Хэргийг АНУ-ын дайсагнасан бодлогын мөсөн уулын орой л гэж Ким одоо дахин тодорхойлжээ.

Дайсагналын бусад жишээ болгон тэрбээр цэргийн хамтарсан сургуулилт, Өмнөд Солонгос, АНУ, Японы Гадаад хэргийн сайд нарын саяхны уулзалтыг дурджээ. Тэр уулзалтаар сайд нар Хойд Солонгосыг цөмийн зэвсгээс бүрэн ангижруулах зорилгоо дахин баталгаажуулсан аж.

АНУ дайсагнасан бодлогоо орхих нь бүх асуудлыг шийдэх гол нөхцөл бөгөөд тэгэхгүй бол хэлэлцээнд суух шалтгаан байхгүй гэж Ким үзэж байна.

Энэ бодлого шинэ дээд хэмжээнд хүрч байгаа тул хариу арга хэмжээ ч мөн шинэ түвшинд хүрэх нь зүйн хэрэг гэж тэрбээр сануулсан байна.

Ямар арга хэмжээ авахаа Ким тодруулаагүй юм.