АНУ-ын Агаарын цэргийн хүчний онгоцууд Израиль руу цэргийн ачаа тээвэрлэх нислэгүүд хийжээ

АНУ-ын Агаарын цэргийн хүчний цэргийн тээврийн онгоцууд сүүлийн өдрүүдэд АНУ-ын эх газраас Израилийн Овда агаарын бааз руу ачаа тээвэрлэх хэд хэдэн нислэг хийжээ. Энэ тухай Интерфакс агентлаг Британийн цэргийн нислэг ажигладаг сайтын мэдээлэлд тулгуурлан мэдээлэв.

Наад зах нь гурван нислэгийг хүнд даацын цэргийн тээврийн онгоцоор Техас мужийн Форт-Блисс дахь Биггсийн армийн нисэх буудлаас гүйцэтгэсэн байна. Тэнд Пэтриот зенитийн пуужингийн цогцолбор, Таад пуужингийн довтолгооноос хамгаалах системээр зэвсэглэсэн агаарын довтолгооноос хамгаалах 69 дүгээр артиллерийн бригад байрладаг.

Үүнээс гадна АНУ-ын цэргийн тээврийн онгоцууд Германы Рамштайн агаарын баазад завсарлан Ойрхи Дорнод руу ниссэн нь бүртгэгджээ.

Өмнө нь Уолл Стрит Жорнал сонин Пентагон арваннэгдүгээр сарын эхээр болох Конгрессын завсрын сонгуулийн дараа Ираны эсрэг цэргийн ажиллагаа явуулж болзошгүй тул агаарын довтолгооноос хамгаалалтыг бэхжүүлэхээр Израиль зэрэг Ойрхи Дорнод руу нэмэлт Пэтриот пуужин илгээж байна гэж мэдээлсэн юм.

Израилийн Овда агаарын баазад АНУ-ын Агаарын цэргийн хүчний сөнөөгч онгоцны бүлэг байрладаг бөгөөд тэд Ираны эсрэг байлдааны ажиллагааны үеэр агаараас цохилт өгөхөд идэвхтэй оролцож байжээ.