АНУ-ын давж заалдах шүүх Калифорнийн 20,000 саналын хуудсыг хасуулах Трампын хүсэлтийг дахин хэрэгсэхгүй болгов
Шүүх засаг захиргааны хүсэлт Үндсэн хуулийг зөрчиж, эрхтэй сонгогчдыг санал өгөх эрхээ алдахад хүргэх эрсдэлтэй гэж үзжээ.
АНУ-ын давж заалдах шүүх иргэншилгүй хүмүүс санал өгсөн байж болзошгүй гэх үндэслэлээр Калифорнийн 20,000 саналын хуудсыг тусгаарлах Трампын засаг захиргааны хүсэлтийг долоо хоног хүрэхгүй хугацаанд хоёр дахь удаагаа хэрэгсэхгүй болгожээ. Энэ тухай Аль Жазира мэдээлэв.
Арваннэгдүгээр сарын 3-ны завсрын сонгууль болоход дөрөв хүрэхгүй хоног үлдээд байхад гарсан шийдвэрт 9 дүгээр тойргийн давж заалдах шүүх уг хүсэлт Үндсэн хуулийг зөрчиж, эрхтэй сонгогчдыг эрхээ алдахад хүргэнэ гэж дүгнэжээ.
“Нэгдсэн Улсын хүсэлтийн үр дагавар нь саналын хуудсыг зүгээр тусгаарлах биш, эцэстээ саналыг хүчингүй болгож, сонгогчдыг жагсаалтаас хасах явдал юм” гэж шүүхийн олонхи бичжээ.
Трамп болон түүний өмнөх Ерөнхийлөгч Жо Байдены томилсон шүүгчид олонхийг бүрдүүлсэн бол Трампын томилсон гурав дахь шүүгч эсрэг санал бичжээ.
Засаг захиргаа иргэншилгүй байж болзошгүй бараг 20,000 хүн шуудангаар санал өгөх хуудас авсан гэж мэдэгдэж, аравдугаар сарын 15-нд мужийг шүүхэд өгсөн юм. Гэвч жагсаалтын үнэн зөв байдал эргэлзээтэй бөгөөд Невада мужийн эрх баригчид ийм жагсаалтад нэг ч нэр зөв байгаагүйг мэдэгдэж байв.
АНУ-д сонгуулийн луйвар, иргэншилгүй хүмүүсийн санал өгөлт туйлын ховор бөгөөд холбооны сонгуульд иргэншилгүй хүн санал өгөхийг бүх 50 мужид хориглодог. Трамп энэ оны эхээр улсын хэмжээнд 278,000 хүртэлх гадаадын иргэн сонгогчоор бүртгүүлсэн гэж мэдэгдэж байсан юм.
Засаг захиргаа өнгөрсөн долоо хоногт Калифорнид 28 гадаадын иргэнийг сонгуультай холбоотой зөрчлөөр буруутгасан ч тэдний зарим нь хэзээ ч сонгогчоор бүртгүүлж байгаагүй гэж Лос Анжелес Таймс сонинд хэлсэн юм. Ардчилсан намын бэхлэлт болох Калифорни арваннэгдүгээр сарын 3-нд Төлөөлөгчдийн танхимын 52 гишүүнийг сонгоно.
