Германы болон Францын эрх баригчид Хэллоуины амралтын өдрүүдэд болох жагсаалд бэлтгэж байна
Европыг хамарсан залуучуудын эсэргүүцлийн давалгаа Германд хүрч, амьжиргааны өртөг, сургуулийн нөхцөлд дургүйцсэн 150 мянга орчим хүн гудамжинд гарахаар бүртгүүлжээ.
Герман, Франц амралтын өдрүүдэд Хэллоуины баяртай давхцаж болзошгүй жагсаалд бэлтгэж байна. Энэ тухай Аль Жазира мэдээлэв.
Германд Берлин, Франкфурт, Кёльн зэрэг 30 орчим хотод бямба гарагт ойролцоогоор 150,000 хүн жагсахаар бүртгүүлжээ. Цагдаа улсын хэмжээнд олон мянган нэмэлт ажилтан гаргахаар төлөвлөж, зарим тансаг үнэт эдлэл, хувцасны дэлгүүр дээрэм, хүчирхийллээс хамгаалж цонхоо хаажээ.
Германы жагсаалыг Залуу үеийнхэн шийднэ хэмээх бүлэг удирдаж байгаа бөгөөд тэд амьжиргааны өндөр өртөг, муу засвартай сургууль, засгийн газрын зардлын бууралт, улс төрчид залуу үеийг үл тоомсорлон шийдвэр гаргаж буйг эсэргүүцэж байна.
Сүүлийн долоо хоногуудад Европыг үнийн өсөлт, боловсролын байгууламжийн доройтол, ирээдүйн хэтийн төлөвгүй байдлын эсрэг голдуу залуучуудын удирдсан жагсаалын давалгаа хамарсан юм. Францын хот, тосгодыг дараалсан гурван амралтын өдөр ижил төстэй жагсаал доргиожээ.
Францын цагдаа энэ амралтын өдрүүдэд улсын хэмжээнд 70,000 цагдаа гаргаж, Парисын метроны 40 гаруй буудлыг хааж, жагсаалд нүүрээ халхлахыг хориглохоор болжээ. Дотоод хэргийн сайд эмх замбараагүй байдал үүсэх эрсдэл маш өндөр байгааг анхааруулсан байна.
“Дэлгүүрийн эзэд бямба гараг дуусахыг тэсэн ядан хүлээж байна” гэж Францын Худалдааны танхимын ерөнхийлөгч Ален Ди Крешензо Франс Интер радиод хэлээд, хүмүүс маск зүүх тул Хэллоуин нөхцөл байдлыг хүндрүүлж байгааг онцолжээ.
Хоёр долоо хоногийн өмнө Францад амьжиргааны өртөг, сургуулийн нөхцөлийн эсрэг жагсаал их хэмжээний дээрэм, үймээн болон хувирсан бөгөөд өнгөрсөн амралтын өдрүүдэд ч цагдаатай үе үе мөргөлдсөн юм.
