АНУ-ын гэрээт ажилтан Тыграйн дайчдыг устгахад туслах нууц мэдээллийг Этиопт дамжуулсан гэдгээ хүлээн зөвшөөржээ

Этиопод төрсөн АНУ-ын иргэн Абрахам Теклу Лемма 2020 онд эхэлсэн иргэний дайны үеэр дайчдыг онилж устгахад туслах зорилгоор маш нууц тагнуулын мэдээллийг Этиопт дамжуулсан гэдгээ хүлээн зөвшөөрснийг Би Би Си мэдээлжээ.

АНУ-ын Хууль зүйн яамны мэдээгээр тэрээр хоёр гаруй жилийн турш олон арван нууц баримт бичиг, зургийг Этиопын өндөр албан тушаалтнуудад дамжуулсан байна.

54 настай Абрахам Төрийн департамент, Хууль зүйн яам, АНУ-ын тагнуулын хиймэл дагуулыг хариуцдаг үндэсний тагнуулын газарт гэрээт ажилтнаар ажиллаж байжээ.

Прокурорын хэлснээр тэрээр хамгаалалттай байгууламжаас нууц материалыг гаргаж, мэдээллийн технологийн администраторын эрхээ ашиглан цахим файл татаж авсан бөгөөд хиймэл дагуулын зураг, цэргийн үйл ажиллагааны мэдээллийг шифрлэсэн мессежээр дамжуулжээ.

Холбооны мөрдөх товчооны мэдээгээр Этиопын албаныхан түүний өгсөн мэдээллийг цэргийн ажиллагаанд ашигласан аж.

«Эдгээр хүмүүсийг нэг мөсөн дуусгах ёстой, эс тэгвээс Этиопод хэзээ ч энх тайван тогтохгүй» гэж тэрээр 2021 оны 12 дугаар сард Этиопын нэгэн албан тушаалтанд бичсэн нь шүүхийн баримтаас харагджээ.

Түүнийг 2023 оны 8 дугаар сард Мэрилэнд мужид баривчилсан бөгөөд ял шийтгэлийг 2027 оны 4 дүгээр сарын 14-нд оноохоор товлосон байна.

2020 оны 11 дүгээр сард эхэлсэн хоёр жилийн дайнд хэдэн зуун мянган хүн амь үрэгдэж, олон сая хүн дүрвэсэн бөгөөд 2022 оны 11 дүгээр сард байгуулсан энхийн хэлэлцээрээр гол тулаан зогссон юм.