АНУ-ын конгрессмен Оросын дизель түлш импортлох компаниудад хариуцлага тооцно гэж анхааруулав

Интерфакс агентлаг Политико сайтыг иш татан мэдээлснээр, АНУ-ын Төлөөлөгчдийн танхимын Ардчилсан намын гишүүн Жейми Раскин Америкийн газрын тосны хүрээлэн болон түлш, нефть химийн бүтээгдэхүүн үйлдвэрлэгчдийн худалдааны холбоонд илгээсэн захидалдаа Оросын дизель түлш импортлох газрын тосны компаниудад хариуцлага тооцно гэж мэдэгджээ. “Ийм байдлаар үйлдэхээр шийдсэн хүмүүс өөрсдийн эрсдэлээр ажиллаж байгаа бөгөөд энэ эсвэл дараагийн засаг захиргааны үед хуулийн дагуу хатуу хариуцлага хүлээх нь гарцаагүй” гэж захидалд дурджээ.

Раскины тодруулснаар, Оросын дизель түлшийг АНУ-д оруулж ирсэн хэн боловч холбооны хууль зөрчиж байгаа тул иргэний болон эрүүгийн хариуцлага, тэр дундаа 20 жил хүртэлх хорих ял хүлээж болзошгүй аж.

Үүнээс өмнө Ардчилсан намын сенатор, конгрессменууд хэд хэдэн банк, далайн боомтод захидал илгээж, Москватай байгуулсан дизель түлшний хэлцлийн талаар мөрдөн шалгалт явуулж болзошгүй тул Оростой холбоотой гүйлгээний бүх мэдээллийг хадгалахыг хүссэн байна. Тэд Оросын дизелийг АНУ-д импортлох аливаа тохиолдол ноцтой хууль зүйн асуулт дагуулж, шүүх болон Конгрессын мөрдөн шалгалтын сэдэв болж болзошгүй бөгөөд хэлцэл АНУ-ын үндэсний аюулгүй байдалд эрсдэл учруулж болзошгүй гэж үзжээ.

Харин Цагаан ордны хэвлэлийн төлөөлөгч Тейлор Рожерс Оростой байгуулсан дизель түлшний хэлцэл холбогдох бүх хуульд нийцэж байна гэж мэдэгдэв. Америкийн хэвлэлүүдийн тэмдэглэснээр, 11 дүгээр сарын 3-нд болох завсрын сонгуулиар Ардчилсан нам Конгрессын нэг эсвэл хоёр танхимын хяналтыг эргүүлэн авбал мөрдөн шалгах, хяналт тавих томоохон эрх мэдэлтэй болж, Ерөнхийлөгч Трампын Оросоос дизель түлш импортлох оролдлогыг шалгах боломжтой болно.